謝婷婷前晚出席活動時自爆早前的非洲之旅驚險重重，倒楣到極的她不但患上肺炎，更被偷走8,000美元！而獨自歐遊的劉嘉玲，竟看「一夜情」藝術展，認真大膽！

謝婷婷談起非洲之行，仍猶有餘悸。

劉嘉玲也想去禪修，體驗「三日無語」的感覺。

謝婷婷前晚出席時裝活動，問到前大嫂張栢芝近日返港，是否見過兩個姪兒？婷婷表示也是剛剛從非洲返港，對於栢芝聲稱並非移民，她亦坦言不清楚。而婷婷又指在非洲逗留了兩個多星期，為有關拯救動物的計劃拍攝，明年會舉行展覽作慈善籌款。婷婷表示此行發生很多事，更患上肺炎：「雖然依家已經好番，但仲要食藥，嗰度睇醫生唔易！」她又自爆在津巴布韋被偷了8,000美元，要向母親狄波拉求救寄錢給她。此外，婷婷去找獅子拍照時，下車五分鐘即看到獅子咬傷了照料員，幸好當時她與該獅子距離六米。她表示不應該告訴媽咪讓她擔心。

偉仔台灣禪修

而同場的劉嘉玲前晚出席活動時表示剛歐遊返港，但老公梁朝偉未有同行：「我啱啱落機，去咗Fashion Week，同埋喺倫敦玩咗幾日。我去睇時裝同藝術展，個藝術展好特別，邀請咗一百對Couple喺船上面One Night Stand，淨係睇到佢哋嘅剪影，有放煙花，煙花代表咗佢哋高潮有幾多秒。（會唔會覺得尷尬？）唔會尷尬，我覺得好浪漫同好有創意。」問到為何不與偉仔一起去，嘉玲說：「佢去咗台灣法鼓山禪修，好難Book，去修三日禪，三日唔准講嘢，林青霞同曾志偉都試過，我都想試吓三日唔講嘢係點嘅，連志偉咁嘈都可以忍到。」對於老友王菲返港，身在歐洲的她未能照顧對方，她說：「佢唔使我照顧，佢好獨立，知道做緊咩。（會唔會約佢去旅行？）未有計劃，等佢放鬆一下先。（有傳阿菲再出碟？）佢應該要出碟，佢唔唱歌好嘥。」