歌手龍小菌突然肚痛急送院,經診斷後發現腹部有如杧果般大的硬塊,至今病情未有好轉。她在急症室候診時,又發生不愉快事件,正當她絞肚痛時,卻被疑似休班警員多番纏擾要求合照,激得在旁的緋聞男友兼經理人差點爆粗驅趕!

留院觀察的小菌服藥後症狀未減,一臉憔悴。

小菌前日出席活動時精神奕奕,原來是死頂。

經理人邵子風在醫院陪伴小菌,並爆疑似休班警員騷擾!

龍小菌前日忍着肚痛出席中環的公開活動後,於凌晨時分劇痛難當,加上發燒和全身乏力,故致電經理人兼緋聞男友邵子風送她入院,經醫生檢驗後需留院觀察。小菌又在Facebook上載吊鹽水的住院相,向Fans交代病情。

昨日小菌以微弱的聲線接受電話訪問:「尋晚真係痛到忍唔到,最驚係摸到個肚有硬塊!(係咩病?)照咗超聲波同X光,喺肚度抽咗組織出嚟驗,依家等緊報告,未知咩病。(會唔會食錯嘢?)唔會!」又指服藥後燒仍未退,腹痛未減,要坐輪椅如廁。此外,小菌在急症室遇到一名男子兩度要求戴住口罩的她合照,激得邵子風差點爆粗大罵,又氣憤地說:「嗰個人冇理小菌肚痛到就快死,仲嚟騷擾佢要影相,真係好過分!我聽到佢同另一個警員對話,懷疑嗰個人係休班警員!」

無懼病情擔心工作

問到有否擔心患重病?小菌竟說只擔心影響工作,昨天已取消錄音,其後的教班、學校分享會及九展騷未知能否出席。