胡鴻鈞一向行乖仔路線，但他最近求變心切，密謀操練鋼條身材，待時機成熟即解放「兩點」。他又向公司提出邀請韓妹擔任新MV女主角，希望以Body Language擦出火花。

胡鴻鈞積極操Fit，決心練出鋼條身材。

胡鴻鈞找來韓妹擔任新MV女主角，認真艷福無邊！

胡鴻鈞邀得鍾嘉欣為其新碟寫歌，十分幸運！

影帝張家輝自成功操出八舊腹肌後，圈中掀起一股「爆肌」熱潮，而一向形象斯文的胡鴻鈞（Hubert）也不例外，決定苦練鋼條身材，他說：「我想Keep Fit，始終做歌手要有形象，身邊朋友話我大隻會好睇啲，我都想鋼條少少，唔想成日畀人感覺文質彬彬。」問到是否想以Body吸引女仔？他笑說：「唔關事，係自我感覺好啲，同埋做運動都對唱歌有幫助。」出道以來一直力保「兩點」的他更揚言待時機成熟時會展示成果，他說：「我唔係呢個形象，我個人比較慢熱，睇吓有咩機會先，要搵個合適嘅場合。」

獲鍾嘉欣寫歌

剛出新碟的Hubert今次除了獲鍾嘉欣寫歌外，更首次親自寫歌答謝粉絲，他說：「因為由巨聲幫到依家，見到粉絲人數愈來愈多，成日都覺得自己何德何能？所以啲歌詞係講一班粉絲畀咗好多鼓勵同勇氣我。」

雖然新碟是走情歌風格，但自言少拍拖經驗的Hubert只能靠幻想，他更表示將好友吳若希（Jinny）的失戀經驗當參考：「惟有留意身邊人啦！有幻想過Jinny同佢個Ex分手嘅情景，因為我冇經歷過刻骨銘心嘅愛情。」在MV中經常艷福無邊的他更希望下次找外籍索女做對手，他說：「希望公司下次搵外籍女主角，最好就係韓國同日本Model，因為語言不通反而冇咁尷尬。」