常言道女人四十一支花，但女星張文慈是女人四十大頭蝦，雖然外表成熟醒目，但私底下竟屬冇記性一族，又因大懵而錯漏百出，曾因着錯鞋被黃秋生即場篤爆！

自言大懵的Pinky曾忘記拿手袋和取車，爆笑事多不勝數。

Pinky雖然大頭蝦，但她笑言因而增添不少人生樂趣。

Pinky回想被黃秋生發現她着錯鴛鴦鞋一事，至今仍覺瘀爆！

張文慈（Pinky）踏入女人花樣年華40歲，她笑言「大懵」症狀未有隨年歲增長而減輕，反而仍是大頭蝦：「唔熟我嘅人睇我外表，以為我係勁醒目，但識得我耐嘅人，就成日都講笑問我：『你第時會唔會整唔見你BBo架？』我真係勁大頭蝦o架！以前同黃秋生試過拍鬼片，我去到片場，佢就笑笑口同我講：『你着咗鴛鴦鞋？』我嗰陣都未知咩事，一望對鞋就發現原來兩隻腳着住唔同款嘅黑色Boot！真係勁！」

遺失手袋「唔見」座駕

Pinky又細訴生活上的甩漏笑料：「有一次去日本，喺一間居酒屋食完晚飯就返咗酒店，點知第二日一大朝早瞓醒，就發現唔見咗個手袋，但就算即刻去番間居酒屋，人哋都仲未開門，所以就等到佢開門，好彩當地治安好，最後將個袋原封不動畀番我！又試過揸車出街，買完嘢唔記得咗揸咗車出嚟，跟住搭的士返屋企，到第二朝出門望住停車場呆咗，心諗：『點解我架車唔見咗？』後尾先醒起泊咗架車喺街，然後就出去搵番佢！」除因冇記性而爆出不少人生趣事，她還笑言有一樣得着：「我眨吓眼就唔記得唔開心嘅嘢，對我嚟講絕對係好事！」