懷孕5個多月的陳茵媺(Aimee)昨晨返港,老公陳豪接機後不停晒恩愛,問到BB性別及名字等問題,Aimee學足陳豪,只答「遲啲先」,又笑言考慮拍大肚寫真,而陳豪則表示會陪入產房。

與老婆「團聚」的陳豪笑到見牙唔見眼,而戴住鑽戒(小圖)的Aimee不時以手護肚。

見到粉絲的BB,令陳豪及Aimee父愛母愛大發。

陳豪情不自禁輕撫Aimee的大肚,場面溫馨。

步履輕盈的Aimee在爸爸陪同下抵港。

「愛妻號」陳豪(右)甫上車即照顧老婆。

陳豪及陳茵媺今年6月在巴黎結婚、7月在加拿大擺酒,一直留在多倫多養胎的Aimee昨晨約5時15分與父親返港,陳豪及經理人到場接機,陳豪甫見Aimee即忍不住輕撫她的大肚晒恩愛!期間半百記者守候,亦有不少途人圍觀,雙陳大方企定定任影,並逐一接過Fans的禮物及合照,當兩人見到粉絲的BB時,更忍不住逗玩BB。

懷孕初期喪嘔

肚凸凸的Aimee手腳仍算纖瘦,並親自推行李,她戴上陳豪所贈的巨型鑽戒、手鏈及耳環,其後雙陳齊齊受訪,Aimee笑言掛住老公,並透露懷孕初期經常嘔吐大作,頭幾個月要攬住廁所,最近才舒服一點。問到坐長途機可有不適?她說:「OK,空姐好照顧我。(增磅幾多?)唔可以重太多,會影響健康。」問到BB性別時,Aimee與陳豪口徑一致:「未睇醫生。(喺香港生?)遲啲先肯定到。(開刀定順產?)睇咗醫生先。(懷孕5個月?)遲啲先啦!」問到是否2013年內生BB?她突然大惑不解,要陳豪解釋後才明白,但仍拒絕透露。再問到是否已決定BB英文名?她只表示男、女名字都有心水,並很有意義。

提到陳豪曾笑言想為她拍大肚裸照,Aimee愕然地望實老公,陳豪即急急否認,Aimee笑說:「我覺得唔似佢講,個問題咁曳!(咁會唔會影?)或者可以,留個紀念。」問到會否叫陳豪陪入產房?Aimee表示一定要,但笑問陳豪會否剪臍帶時,陳豪即面紅,並表示交由醫生安排。問到是否怕血?他懶醒說:「我都演過好多次醫生o架!」至於復工問題,Aimee已交由經理人處理,Aimee父親亦表示未知外孫性別,但笑言「男女都想」,其後眾人驅車返回大埔比華利山寓所。

「一家三口」值錢

此外,據知無綫及廣告商希望食Aimee「頭啖湯」,其中無綫監製羅永賢已安排她拍攝明年的重頭劇:「明年二、三月左右開。(唔驚佢收唔切身?)佢依家好瘦好靚!呢部《太監五虎》有王后角色,陳豪叫佢『王后』,就畀佢演王后!」更有公司出高近三倍價錢達15萬元邀請Aimee出席活動。無綫高層樂易玲說:「好多老闆想搵佢哋『一家三口』做嘢,仲傾緊!」