歌手鄧麗欣（Stephy）搞慈善相展，男友方力申獨個兒撐場，並在一張Stephy與男模親熱的照片前騷麒麟臂挑機，Stephy揚言Part 2相展會有更大膽的性感照，自己睇到亦都心跳不止。

打翻醋埕的小方，在Stephy的「床照」前力谷麒麟臂以示不滿。

對攝影師充滿信心的Stephy任影唔嬲！

Stephy的慈善相展叫好叫座，難怪下月有Part 2啦！

鄧麗欣（Stephy）日前在銅鑼灣舉行的慈善相展已結束，男友小方在相展最後一天神秘現身撐場，Stephy說：「因為打風關係，相展突然要提早一日完，特登叫佢快啲去睇。」當日小方特意走到肌肉男伸頭「捐」入Stephy小背心內的最激一張相前，拉起衫袖大晒「麒麟臂」，擺明要跟肌肉男鬥過，醋味勁濃！Stephy笑說：「啲相佢之前睇過，佢都覺得好靚，其實佢OKo架！（佢對你性感同大膽點睇？）佢唔係好大男人，唔會乜都唔畀我做，都係以藝術角度去睇。」

Stephy正計劃下月中舉行Part 2相展，並自爆可能有更大膽、更激的照片，她笑說：「啲相已經影咗，依家揀緊，其實Part 1啲人嘅反應都唔係覺得大膽，不過Part 2啲相自己睇番都心跳，都考慮係咪攞出嚟用，對我來講都係挑戰，但攝影師米高係我好信任嘅人，同佢合作我好放心，佢都好開心我咁豁出去畀佢影。」可是小方從未過目Part 2的相，她笑說：「唔知佢覺得點o架！」

大搞迎30歲

下月踏入30歲的Stephy坦言心情忐忑：「有諗過大搞，話晒30歲大壽，但後來都係覺得算啦，唔好搞咁多嘢，但身邊好多朋友逼我搞，話3字頭冇理由唔搞大啲！」剛推出新歌的Stephy透露將簽約新公司，盛傳她將重投舊老闆黃柏高的懷抱，她卻笑住大賣關子說：「好快會知道！」