影后惠英紅一直醉心電影事業，近年更不時中港兩邊走拍電影及電視劇，忙到爆的生活令她感情至今仍未有着落，但豁達的小紅姐卻希望一切隨緣：「依家嘅感情生活同以前一樣都係空白，但唔覺得悲哀，因為好忙，冇乜時間，有就嚟，冇就由佢啦！」

小紅姐（右）首次與內地製片人汪子琦合作，定必擦出新火花！

提到內地新戲《愛未央》近日在上海首映，身為女主角的小紅姐，有幸在拍攝期間穿上博物館借出的服裝，她說：「聽講套戲服值50幾萬人民幣，着住嗰陣都驚o架，驚整爛，埋位之前先會畀我着，拍嘅時候博物館啲人會睇實同埋幫手着，一拍完個鏡頭就要除番出嚟，都幾麻煩。」由於劇情需要大量外景，故她亦大呻辛苦：「我哋要喺昆明嘅少數民族山上取景，日日都要外景，車程要兩至三個鐘，當時又好熱，所以都幾辛苦！」