模特兒Annie G.原來曾經遇上不少奇怪事，如在泰國拍旅遊節目時，其電話失驚無神多次自動致電給男友；在香港完成拍攝後，又被瘋狂粉絲跟蹤到家樓下，認真騎呢！

Annie在回家途中曾被瘋狂粉絲跟蹤，隨時要提高警覺避開他們！

Annie甘願在電影中以醜女造型示人，一過戲癮！

Annie在泰國拍攝時，電話竟然無端端打給其男友劉志偉。

中國及西班牙混血兒Annie G.（吳燕安）除經常飛往外地打碟外，早前亦忙於拍攝旅遊節目。雖然出門旅遊可以寓工作於娛樂，不過Annie表示遇上的奇怪事多籮籮。例如有次她在泰國拍攝期間就遇上了「靈異事件」，她的電話竟然「失驚無神」自動致電了男友劉志偉：「有一晚發覺個電話無端端打咗畀志偉，本身我瞓咗覺，但我一起身望個電話，發現志偉發短訊畀我，問我點解凌晨打電話畀佢，我覺得好奇怪，同佢講我冇打過畀佢，因為我已經瞓咗覺！後來佢同我講，我凌晨打咗畀佢幾次，而當佢接聽個電話時，竟然係冇聲！隔咗一陣個電話又再打畀佢，所以都幾驚！」

除了靈異事件外，Annie在香港亦試過被瘋狂粉絲跟蹤，她說：「拍旅遊節目成日要去唔同地方採訪，離開嘅時候都會有好多人影相，有啲男士直程跟住我返屋企，通常我都會叫旁邊嘅攝影師保護我，但當我一個人嘅時候就會盡量避開佢哋，如果太過分，我梗係會出聲話啦！」

願拋形象做醜女

雖然Annie做主持為多，不過她表示很想拍電影，演一些具挑戰性的角色，她說：「我想做醜女，唔想做啲好斯文又冇乜發揮嘅角色！」不過問到會否接受在戲中與男星激吻時，她笑說：「我諗難啲！如果真係劇情需要，我事前都會同男朋友報告咗先，因為平日我哋各自同異性工作時都會同對方講！」