曾傳緋聞的吳千語與周柏豪前晚不避嫌翹手行時裝騷，柏豪又主動搭她膊頭，兩人全程大方又自然。千語坦言不用跟男友林峯備案，因男友同樣是圈中人，自然會明白她是為了工作。

千語翹住柏豪出場，揮晒手儼如公主與王子。

懷孕4個多月的Cara G.仍穿4吋高踭鞋。

前緋聞男女周柏豪與吳千語前晚齊為英國時裝品牌TED BAKER行騷，已非首次同場的兩人還翹手出場，擺甫士影相時柏豪又主動搭千語膊頭。提到再度合作，千語笑言已生厭，柏豪則笑說：「頭先我Fitting時見到佢已經話『又係你囉』！（厭喇？）唔係厭，呢行好細。（兩個一齊會收貴啲？）唔關事。」問到千語跟柏豪拖手可有跟男友林峯備案，她說：「唔使嘅！做嘢啫，佢都係做呢行，會明白。」柏豪解釋是應大會要求「情侶檔」和要有互動Pose，才一起出場和搭膊頭：「我都有問佢有冇備案。（你驚呀？）唔係驚，係尊重。（驚唔驚再傳緋聞？）唔驚，我驚對鞋會跣親。」而昨日網上瘋傳一張AV三級意淫照，男主角疑似柏豪，他透過公司回應：「唔係我嚟，依家日本AV都咁潮有柏豪頭。」

同場還有在賀歲片中飾演千語老公的林德信，千語說：「戲中我哋會生BB，拍戲時好快熟咗做咗朋友，感情幾好。」但她表示不知道對方多緋聞，還反問：「係咩？咁犀利？佢好有女人緣，因為佢性格好好，啲女工作人員都好鍾意佢！（男友呷醋？）冇，我哋都冇親熱同床戲，係好溫馨嘅。」

大肚Cara照着高踭

混血模特兒Cara G.與老公Jesper拍拖到場，懷孕4個多月的她竟穿4吋高踭鞋，Cara說：「工作先着高踭鞋，平日着平底鞋。（BB係仔定女？）過多一、兩星期先知。」她又踢爆老公對快將初為人父感到驚恐：「因為第一次湊BB咩都唔識。」Jesper笑說：「我想Skip湊BB嘅過程，可以直接同BB玩。」