蔡少芬撈埋童裝目標上市
圈中藝人另起爐灶做生意並非新鮮事，父母級藝人蔡少芬與曹永廉亦積極搞生意「開源」，昨日分別為投資七位數的童裝店及冰室主持開幕儀式，坦言要「做到上市」的蔡少芬還拉埋兩個囡囡及老公張晉齊齊造勢，場面溫馨！
蔡少芬一家四口造勢，她還跟大女楚兒（左二）着母女裝做「生招牌」。
曹永廉的冰室亦於昨日開張，擺出勝利手勢信心十足。
蔡少芬（左）的童裝店開幕，老友兼人母姚瑩瑩帶埋兒子撐場！
曹永康（右二）開餐廳，好友洪天明（左起）、黎耀祥及黃智賢嚟黐番餐！
吳啟華與陳慧珊捧蔡少芬場，唔知有冇順便幫自己個女買番件衫呢？
全店焦點落在楚兒及信兒身上，個個索合照，包括宣萱在內。
蔡少芬（Ada）昨日榮升老闆娘，在金鐘開設童裝品牌店，老公張晉、大女張楚兒及幼女張信兒均有現身撐開幕，而Ada圈中好友包括吳啟華、陳慧珊、宣萱、毛舜筠、洪欣及姚瑩瑩等亦到場支持。談到當老闆娘感受，Ada表示興奮之餘，還找自己及女兒做「生招牌」宣傳：「因為係第一次自己落手落腳搞生意，今日着件衫同大女一樣，將童裝改成大人版。（今次投資咗幾多錢？）我同兩個朋友一齊夾，投資咗七位數字以上。」
新店剛開幕，但Ada已透露正物色新舖，希望下季可以開分店：「希望可以做到上市，因為呢個係我夢想！」Ada又指擔心囡囡在活動期間會喊及冇精神，所以特別祈了個長禱：「不過佢哋今日精神好好，冇喊之餘仲畀我幫佢哋化妝、整頭髮同着靚衫。」
提到投資是自己還是老公出錢？她透露一家四口都有份：「兩個女負責做Model，我同老公負責Design，冇分你我，總之都係屋企錢。」而兩夫婦昨日更全天候在微博發功，為新店宣傳，還大晒早前與大女拍攝的品牌宣傳照。至於提到早前在內地「被綁架」事件，Ada表示已交由律師處理：「今日係開心事，唔想講唔開心嘅事。（仲會到內地工作？）梗係會！（幾時？）仲傾緊。（考慮請保鏢？）未諗，都係交畀經理人決定，其實都唔係小唔小心嘅問題，我做足分內事。（老公喺微博爆粗？）今日唔好喇！要爆開心，爆熱情！」問到囡囡知否媽咪「被綁架」，Ada笑說：「佢哋淨係知媽咪返咗嚟。」
「當畀多條路自己行」
好爸不易做，育有一對仔女的曹永廉為吸金，亦跟哥哥及拍檔一起在觀塘投資開冰室，餐廳亦於昨日開幕。阿廉透露三十多年前已想開冰室：「但一直冇諗點去實現，咁啱我阿哥同佢Partner開餐廳，有咗經驗，所以同佢哋夾份開。當畀多條路自己行，因為仔女仲返緊學，搵食艱難，而且開餐廳可以畀朋友多個聚腳點！（投資咗幾錢？）每人七位數字。」他又透露將會在同一個地方再開食肆：「因為投咗兩間舖，但仲未諗過做咩形式。」提到會否學Ada般擴充分店？他笑言不敢開連鎖式餐廳：「唔敢咁大想頭，雖然開始做生意，但都會專注演藝事業。（少咗時間陪家人？）盡量就番，一得閒就會接小朋友放學。」
