藝人余曉彤（Hidy）再做「打女」，偕八両金到馬來西亞拍新片，她大讚對方身材正，不過拍攝打戲時，Hidy不慎被真刀劈傷手，為不阻拍攝進度，她竟流住血頂硬上！

「食過夜粥」的Hidy跟八両金高手過招，忍不住大讚他腹肌強勁！

拍攝時不慎被真刀所傷，Hidy（右）依然頂硬上，非常專業。

Hidy與男演員拍抽水戲份，被蜥蜴爬入事業線都唔驚！

由模轉型做「打女」的Hidy，繼拍畢電影《爆3俏嬌娃》後，早前遠赴馬來西亞拍新片《紅毛道士》，飾演巫師後代的她亦忠亦奸，由香港飛往馬國搵道士報仇，與八両金高手過招。Hidy大爆食過「夜粥」的八両金身材弗到漏，睇到「O嘴」的她說：「佢練開功夫、詠春，仲有八舊腹肌，佢叫我打佢一拳，我咪打落佢個肚囉！點知真係得喎！」她又笑指對方搞笑又熱情：「佢經常袋住把梳，拍戲中途會不時梳頭，仲會同我講佢嘅身世，又送衫畀我，佢習慣帶茶葉食飯，仲會畀埋我飲。」

提到在森林拍打鬥戲，Hidy指劇組竟用真刀，嚇得她問：「係咪真o架？」雖然工作人員已用膠紙封刀，但Hidy仍難逃血光之災！她說：「開頭對戲我用手擋，突然覺得有啲痛，原來隻手流緊血！我諗住唔好煩到人，所以頂硬上，後來頂唔順，話畀劇組知。」

被蜥蜴抽水

片中，Hidy為引仇家埋身，利用對方的「鹹濕」個性做弱點，成功以美色誘男方上當，當中更不乏夢中攬錫場面，她說：「有場戲講隻蜥蜴跌咗落我心口，佢幫我攞番出嚟趁機抽水，其實拍攝時都有掂到，不過佢又唔會摷嘅，摷嗰部分有搵替身。（真係抽水？）冇，我諗佢有少少驚我，因為戲中我會打佢！」