胡渭康和組合Choco同樣是月餅狂迷，胡渭康更試過一口氣清掉整盒四黃白蓮蓉月餅，結果滯到入廠！不過見過鬼唔怕黑的他，日前就拉Choco跟師傅學整奶黃月餅。想不到一個小小的月餅令他們叫苦連天，要經過多重煩瑣步驟才能完成，大家都對這些「愛心月餅」愛不釋手！

胡渭康和Choco幾經辛苦才做出五個迷你月餅，賣相不俗，不知味道如何？

看來Choco四小花廚藝麻麻，整月餅整到手騰腳震。

胡渭康（右）如此愛吃月餅，跟師傅學最適合不過！

中秋將至，胡渭康和組合Choco日前跟師傅學整月餅，平時少入廚房的四人有點雞手鴨腳，似在玩泥膠多過整月餅，到了最難的包餡步驟，眾人更是叫苦連天，主音Mel大呻：「塊皮咁細點包得晒個餡呀！」幸好在師傅的教導下，大家終成功整出獨一無二的月餅。

胡渭康愛月餅的程度可謂無人能及：「我已經食清咗幾盒啦，仲試過食到入醫院！嗰次食完飯，一個人食晒成盒四黃白蓮蓉，結果滯到入院，不過我梗係唔敢話畀醫生聽食咗成16個黃啦！經過嗰次我依然咁鍾意食，今年仲特登訂咗啲一個6黃嘅月餅！」

中秋食極唔肥

青春無敵的Bass手Cathy亦表示有大把Quota食月餅：「點會怕肥，我仲增緊肥添！而且中秋嗰餐飯一定特別豐富，因為老竇嗰日生日，所以一定會大搞！」但鼓手KiKi就大唱反調：「中秋餐飯係最地獄o架，食完飯仲要食生果、月餅同湯圓，真係完全食唔落！」

胡渭康和Choco談到燈籠，都一致表示舊式燈籠最有風味。Cathy說：「我最鍾意玻璃紙嗰隻，或者白兔仔燈籠，膠嗰啲都唔好玩嘅！」結他手Nova更憶述小時候：「爸爸教我用鞋盒黐玻璃紙自製燈籠！」KiKi笑說：「唔知點解年年都要玩蠟燭，其實點完又冇咩特別，不過點都一定會玩。」