「宇宙最強」甄子丹昨日與太太汪詩詩為慈善出一分力，以已故荷里活著名喜劇影星差利卓別靈的造型亮相！他除了貼上假鬍子及手持「士的」外，更全程「封嘴」，令在旁的詩詩冇晒符！

扮演差利卓別靈的子丹非常入戲，全程默不作聲，要老婆擔任代言人。

一眾嘩鬼齊齊出動，迎接哈囉喂。

汪圓圓（左）及湛琪清以型爆Punk Look上陣。

甄子丹、汪詩詩、汪圓圓及甄家班等昨日出席以「哈囉喂」為題的萬聖節慈善活動，各人為配合主題，紛紛以搞鬼造型示人。子丹貼上假鬍子及手持「士的」，以已故荷里活著名喜劇影星差利卓別靈的造型上陣。為了演繹得維肖維妙，他索性全程做「默劇」，受訪時都堅決「封口」，只做手勢作簡短「對答」，在旁的詩詩見狀即撒嬌問：「你真係唔講嘢呀？老公我攰呀！」不過，丹爺意志堅定，繼續用手勢做拉鏈嘴的動作，令在場人士捧腹大笑！

圓圓Punk Look嚇未婚夫

詩詩受訪時透露是她提議老公以該造型上陣：「拍拖初期佢都扮過畀我睇，我當時覺得好似，所以咪叫佢扮番，等大家可以見到佢搞笑一面！」她表示每年萬聖節都會為子女裝扮，並透露子丹曾扮演小丑，更試過即場表演雜技。

同場的汪圓圓與表妹湛琪清齊齊化身Punk女郎，圓圓戴上假髮出席活動，問到未婚夫蔡加讚可有過目？她指未婚夫尚未見過其造型，更大爆對方愛她留長髮：「我諗住影張相畀佢，等佢睇到嚇一跳呀！」又希望今年能與未婚夫一齊扮嘢，告別兩人婚前最後一個單身萬聖節。