影后劉嘉玲的飲食王國由上海擴展至香港，昨日在尖沙咀連開3間餐飲食肆，投資逾7位數字。由下午剪綵儀式至晚上派對，老公梁朝偉都陪伴左右，更大耍花槍，嘉玲稱呼偉仔做「大爺」，表示待餐廳準備妥當才讓他試菜，偉仔即搞笑地「嘩」了一聲，並答應即晚試食。

嘉玲事業有聲有色，瞓身支持的偉仔亦笑得甜絲絲。

嘉玲剪綵時佩戴的逾千萬元私伙卡地亞鑽飾非常耀眼！

昨日大喜日子，嘉玲大方騷滑溜玉背。

嘉玲昨晚換上另一高貴晚裝出席派對，繼續與朋友分享喜悅。

拍畢電影《一代宗師》後休息1年的梁朝偉，昨日由下午一直陪伴劉嘉玲，以行動支持太太。嘉玲昨午為3間餐飲食肆剪綵，出動逾千萬元私伙卡地亞鑽飾配襯高貴黑裙；晚上派對則換上杏色露肩晚裝，並配以另一套逾千萬元私伙首飾，整天行頭已近半億元！不過記者談及首飾，她即避忌地將手放在背後，稱只是「小兒科」，只有大日子才戴。

笑「大爺」乜都唔識

問到是否全力進軍飲食界，嘉玲說：「唔係，生活經驗愈多，對演戲都有幫助。（投資幾錢？）唔講得。（新聞稿話7位數？）唔只！」問偉仔是否合資，偉仔笑說：「我好蠢，淨係識做戲，唔識投資，所以只會買磚頭當儲蓄。」問到是否賺錢給老婆投資，嘉玲即搶答：「我自己私己錢，佢真係乜都唔識。（少咗時間陪偉仔？）佢都好忙。」對於有報道指她Check實偉仔行蹤，她否認說：「你覺得呢個係嚟o架咩？我咁忙。」至於有否讓偉仔試菜，她笑言暫時未，待一切辦妥才給「大爺」試，偉仔聞言即「嘩」一聲，並笑說：「咁講？今晚試！」說罷即行開，場面搞笑！

直認擁財政大權

嘉玲視餐飲生意為學習，有機會也會嘗試其他生意，問到偉仔不懂投資，財政大權豈非在她手上？嘉玲說：「係呀！基本上喺我手。（唔搞其他生意？）拍戲啦！呢盤生意都唔係我預計內，但愈玩愈投入，辛苦過拍戲。（投資電影？）諗過，但電影牽涉仲多，等我有準備先，我已有最佳男主角、製片及導演。（你就係最佳女主角？）如果我做製片就唔演，到我呢個年紀，應該試其他嘢，觀眾如果唔嫌棄，我會繼續演落去。」又笑言與偉仔當餐廳是飯堂：「我哋會開定房等大家嚟！」

好友王菲昨日無暇到賀，而嘉玲整天忙於招呼中、港、台好友，她說：「好辛苦，辛苦過拍戲，但開心。（今晚不醉無歸？）睇吓飲得幾多，依家唔多飲得。」期間，偉仔再度現身合照，並輕擁太太腰肢，恩愛得很。