「千億新抱」徐子淇昨晚現身活動，以超性感打扮力壓群芳的她透露三個小朋友已開學，故忙得不可開交，連兒子兩星期沒有做功課也不知，但沒有被嚇怕，反而心郁郁想再為李家增添新成員。

低胸搶鏡的子淇大談三個寶貝仔女，母愛滿瀉。

華哥（左）與張震喜相逢，兩人合照時鬥Chok。

悉心打扮的李玟（左）獲公關招待入場。

全智賢與華哥甫見面即來個擁抱。

以火紅低胸晚裝裙上陣的子淇表示，老公李家誠因有事在身而未能陪同，問到如此性感打扮是否需要老公過目？她笑說：「着晚裝OK啦！我平時出街着嘅衫，啲女問我點解着爹哋嘅衫。」被指是全場最性感的子淇表示不是鬥性感，只是大會提供了兩條裙，另一條露背裙則太鬆身。

子淇透露小朋友剛開學，且照顧三名子女非常辛苦：「大女升小一，三個都返學，但放學時間都唔同，每日都要接送，我直情係校車保母，同埋呢排開學好多記者喺學校門口，我唔想佢哋曝光，又唔想唔送，所以要行後門。」子淇提到兒子李俊熹即滔滔不絕，她指兒子現時兩歲讀學前班，黐身的他上學初期都有喊：「依家返學都OK，但已經有功課做，返咗兩個星期我都冇打開過佢書包，點知一打開，入面有紙卡要做，原來佢冇做兩個星期，湊佢哋忙到氣都冇得抖。（係咪訓練囝囝做尖子？）最重要係佢開心，以前見過新加坡一個狀元因為壓力太大，後來跳樓，我見過呢啲嘢，覺得行行出狀元，唔好畀咁大壓力，就算阿仔做畫家都OK。（佢想做乜？）冇，佢鍾意單車，可能做單車工程。」至於會否再追多個？她說：「見佢哋咁得意都心郁郁，但真係冇時間，平時要趁佢哋瞓咗先有少少私人時間。」

一年學費十幾萬

此外，同場還有張曼玉、鍾楚紅、李玟、韓星全智賢及任達華等，華哥甫見老友全智賢即講個不停，他透露今次全智賢來港未能盡地主之誼：「佢好快走，我哋可以喺晚宴敍舊，因為我之後仲要配音。」他又指女兒愈來愈可愛：「阿女大個咗好多，好貪靚，好鍾意拎手袋去買嘢，每日換唔同袋出街，如果佢拍拖，我肯定眼淚在心裏流。」

另外，子淇昨日陪同老爺李兆基（四叔）出席香港科技大學「李兆基商學大樓」揭幕儀式，當四叔問到科大校長陳繁昌學費多少時，陳繁昌回答每年需數萬元，在旁的子淇即表示一點也不貴，還說：「熹熹一年學費都要十幾萬。」