Chilam旺新主市值升1.7億
「Cool魔」張智霖昨日登上房車及直升機，架勢加盟「中國3D數碼娛樂」及續約唱片公司做「一哥」，消息帶挈公司股價昨日急升，市值飆升約1.7億元，難怪他亦笑笑口說：「我係運財童子！」
張智霖的「Cool魔」魅力連股民都追捧，加盟後帶挈新公司的股價急升，市值亦升1.7億元。
張智霖傳以天價加盟蕭定一（右三）旗下，人氣與身家如坐直升機般「衝上雲霄」！
Chilam環島遊時邊笑邊揮手，十足細路仔！
記者會為隆重其事，安排張智霖坐名車入場，排場夠晒大。
張智霖獲多位娛樂圈猛人撐場，包括黃柏高（左）。
憑無綫劇《衝上雲霄II》而人氣爆燈的「Cool魔」張智霖（Chilam），早前傳以5,000萬元加盟電影公司老闆蕭定一旗下，昨日終於動筆！Chilam穿上禮服兼Gel行頭髮，與蕭定一坐上名貴房車現身舊機場4號閘口跑道，即席簽約加盟「中國3D數碼娛樂」及續約「星娛樂（環宇）有限公司」，並獲導演胡耀輝、葉念琛、黃柏高（Paco）及無綫等多間媒體與代言產品的高層撐場。其後，Chilam再度「衝上雲霄」，登上直升機暢遊天際五分鐘，可見備受重視。
股價急升近倍
「Cool魔」魅力沒法擋，連股民都追捧！中國3D數碼（08078）昨日股價一度炒上至6.3仙，升幅接近逾一倍，而中國3D數碼的市值亦由1.8億元飆升至3.5億元。事後，Chilam接受電話訪問時笑說：「咁好？咁我咪係運財童子！公司好咪即係我好。（阿一送股份畀你？）咁又冇喎！不過股票同錢都唔係最重要，我嘅工作動向先最重要。」
記者會上，被問到傳以5,000萬酬勞加盟？心情靚爆的Chilam說：「數目係商業秘密，好開心今日上天轉一圈，好似行大運咁！其實之前《衝II》宣傳都諗住坐直升機，但因為落大雨取消咗，估唔到嚟到呢度可以做到。」記者笑他榮升「一哥」，Chilam即笑說：「蕭定一就係一哥！」
睇定啲再買樓
提到早前被《好報》拍得與太太袁詠儀睇2.2億豪宅，問到是否打算用酬金買樓？他說：「希望香港嘅樓市合理啲，到時再講其他嘢。（買嘢獎勵自己？）吓！重玩？我要努力工作，但我不嬲都好努力工作，只係近排見得我多。」
另外，提到有傳《衝II》拍電影版，他亦承認其事：「原則上係講咗，無綫同阿一合作就皆大歡喜，但都係下年嘅事。（想原班人馬？）原班人馬當然好，但我唔係製作人，點可以講用乜人，做得演員都有自己嘅魅力。」
