「Cool魔」張智霖、陳法拉和胡杏兒等昨晚為劇集大結局亮相商場騷，靈魂人物吳鎮宇因在內地工作缺席，本來也在內地開工的杏兒直言請假返港，令她差點要賠錢。雖然昨晚卡士一般，但無綫太耐沒搞商場睇結局，觀眾反應依然超High。

陳法拉（左起）、張智霖、胡杏兒和羅仲謙，現身商場與觀眾齊看《衝上雲霄II》大結局。

杏兒受大批粉絲歡迎，現場有三百名市民看結局，場面墟冚。

傅嘉莉昨晚亦有出席睇結局。

江美儀（左）和胡定欣一身空姐打扮出場。

張智霖（Chilam）、陳法拉、胡杏兒、胡定欣、江美儀和羅仲謙等《衝上雲霄Ⅱ》演員，昨晚以機師和空姐Look現身將軍澳新都城，與三百名市民欣賞一連兩集大結局，憑劇集名利雙收勁賺八千萬的Chilam，以黑超機師造型Chok爆登場，觀眾大叫想看到他與法拉配成一對。日前自嘲「我賺得幾十萬」的鎮宇，與馬國明和吳卓羲因工作缺席，焦點落在Chilam、法拉和杏兒三位主角身上，單立文在直播期間以「狼虎年華」形容江美儀，令人O嘴。

胡杏兒險賠錢

Chilam坦言對劇集大結局感不捨，對於開拍電影版，他說：「監製梁家樹有同我講過，但因為大製作，最快出年先成事，未知落實邊啲演員。」談到鎮宇「只賺得幾十萬」，Chilam笑說：「唔好信佢，佢有錢人，身家不嬲高！」並誇口望收視60點，笑指人人露兩點便「夠晒數」，法拉則笑指只能露一點配合，杏兒就抵死地說：「收視有60點，Chilam同法拉就重現古堡嗰幕，仲要係未刪剪版。」

在北京拍劇的杏兒專誠請假回港：「請假差啲要賠錢，但我唔想畀人感覺我成個劇冇幫手宣傳，鎮宇缺席好可惜！收視唔係我嘅壓力。」

鎮宇缺席可惜

對於鎮宇缺席，法拉說：「好可惜，收視破40點，睇吓兩個型男做啲咩慶祝，佢哋做乜我照做。」她指暫未有人接觸她演電影版，她希望電影版能與電視版不同，自己可與Chilam配成一對。對於有傳簽約經理人鍾珍做陳慧琳師妹，她說：「鍾珍友情幫我手接工作，有前輩幫手，我覺得好幸運！（曾志偉話捧你做張曼玉二號？）我冇諗咁多，有戲拍就開心！」