鍾嘉欣遇爆炸匿入車廂

鍾嘉欣、馬德鐘、羅仲謙和胡定欣等昨日在銅鑼灣加路連山道拍攝新劇《飛虎Ⅱ》大型爆破場面。當工作人員檢查爆破反應裝置時，已建議演員走到較遠位置躲避。此時，嘉欣、胡定欣與黃智雯已迅速走到最後位置，但為怕傷及演員粉臉，工作人員再次着演員轉位躲避。演員當中，唯獨嘉欣BB特別受照顧，獲安排避在車廂中，其餘人士則分別站着或蹲在汽車旁。而爆炸時火勢非常猛烈，濃煙更升至成幢大廈5層頂樓高，附近居民誤以為真爆炸，紛紛報警求助。未幾，消防員與警察到場了解後便帶隊離場。

備受呵護的嘉欣笑言並非想像中般驚慌，問到為何匿入車廂？她說：「工作人員係咁叫我入去，我梗係要聽話啦！大家真係當咗我係BB，其實我唔係咁驚咋！（爆破場面驚動警方！）證明拍戲個效果好真，不過騷擾到附近居民，真係唔好意思。」而見慣風浪的馬德鐘則讚賞本地紀律部隊效率高，但亦對滋擾到附近居民而致歉。監製林志華也對此耍冧：「真係唔好意思，應該係爆炸聲浪嚇親大家，但我哋都依足晒程序，喺指定範圍完成拍攝。」

羅仲謙拍低玩命證據

當演員走到爆破地點一段距離躲避之際，羅仲謙卻勇猛地走上前，戴起飛虎隊面罩並拿出手機瞄準拍攝，拍下整場爆破場面，還四圍與人分享。已非首次拍攝該類場面的他，笑指擁有相當經驗，故不用四處躲避：「頭先影到最後，我仲即刻除帽整Yeah手勢，證明係我拍嘅。（唔驚部電話熱熔？）所以用工作人員手機拍，自己部機爛咗點算？」

智雯與定欣則蹲在汽車旁，直至完成整個場面才敢抬頭，智雯說：「又驚又想睇，好興奮，但起到身已經爆完，攝影師話試過拍呢啲場面冇咗成個頭嘅頭髮，聽到之後仲唔將成個頭有咁低蹲咁低！（有市民以為係真報警！）如果騷擾到要講聲唔好意思！」定欣說：「Feel到塊面好熱，工作人員叫迴避都要走遠啲！」

王君馨休息三周治腳傷

此外，拍《飛虎Ⅱ》的演員多災多難，王君馨上月因拍跑落山的戲份，不慎傷右腳致韌帶撕裂，需做物理治療兼停工休息三周。日前復工的她昨日受訪時表示正在康復：「前日再開番廠景拍咗十幾個鐘都好攰，隻腳要小心保護，企得耐都會腫，要敷冰。而跑嘅鏡頭，導演惟有幫我執吓，改為慢行！」而因拍此劇受傷的羅仲謙，七月拍爆破外景時被玻璃碎片割傷近屁股對落位置的大髀位，要入院縫兩針！他笑言當時因有不少女護士而尷尬不已！