發哥美容谷肌同霆鋒死過
58歲影帝周潤發強勢回歸港產片市場，與年輕廿五載33歲的金像獎影帝謝霆鋒鬥Chok！雖然他曾多次笑言錫住後輩，但面對又Cool又Chok的霆鋒，發哥有備而來，一年前便開始瘦身，並密密美容，笑言要同霆鋒「死過」。
一年前開始健身的發哥，狀態大勇。
霆鋒身材Fit爆兼夠「Chok」，唔會輕易輸畀發哥。
發哥與發嫂一起返拍攝現場受訪，相當親民。
吳辰君大讚發哥「Very Nice」、「好叻」。
港人心中「賭神」代表，58歲的影帝周潤發，與33歲的影帝謝霆鋒合演無綫有份投資的賀歲片《賭城風雲》，昨日原定在澳門拍攝一場養眼泳池戲，卻因下雨而臨時取消，原已返回酒店房的發哥及發嫂，得知有記者到場時，兩人專誠回拍攝現場接受訪問，甚為親民，他透露將會「凸點」演出，並笑言接拍電影前已「鎖定目標」：「接拍時知道有霆鋒，一年前就開始瘦身，但減極都唔夠瘦。」
唔得閒睇港姐
問到是否與霆鋒鬥戲時，發哥笑言先禮後兵：「未到戲肉，依家悠閒啲好Hea，返到廠就同佢打個你死我活！（同佢鬥Chok？）我唔會放過佢，同佢死過！」除積極健身外，發哥亦密密「練兵」，不時光顧老友張兆輝老婆開設的美容院，他搞笑地說：「佢（張兆輝老婆）每星期都要摸我塊面，唔做唔舒服。」問到霆鋒父母謝賢及狄波拉探班時，有否叫他「手下留情」，發哥笑說：「冇講呢啲嘢，我點會蝦佢（霆鋒）呀！錫都嚟唔切啦！佢咁靚仔。」他又笑言虛不受補，霆鋒所送的燕窩由發嫂享用。
談到今屆港姐競選，發哥說：「睇咗少少，嗰日早瞓，個個都好靚女。（心水？）冇估呀！專注同霆鋒死過，佢係我唯一目標！（人哋話冠軍陳凱琳冇身材？）港姐唔係要美貌與智慧？要身材依家有好多模啦！」發哥又笑言沒因下雨取消養眼泳池戲而失望：「我隻眼食晒冰淇淋之後先落雨取消。」他又表示沒有到賭場「玩兩手」，記者笑言他是「賭神」會被人跟注，發哥幽默地說：「咁死人啦！如果跟你買輸咗點算！等陣人哋轉身同你打個招呼，擰轉面唔見十幾萬就死啦！」
吳辰君讚好叻
飾演發哥秘書的吳辰君大讚發哥為人「Very Nice」、「好叻」。問到霆鋒是否很Chok？她說：「初頭以為佢係扮，合作過先知佢真係發自內心。」她表示考慮拍完該片後才「造人」。
