亞視藝人筱靖及黃集鋒昨日被爆前往聲援亞視集會前，於亞視總廠門口吵大鑊，筱靖更喊住上車，事後兩人於現場零交流，但被追問原因時，兩人即隔空對罵火花四起！集鋒先採取主場之利發言攻擊，解釋是因上載筱靖一張走光照到社交網站而「莫名其妙」被人責怪：「可能佢小器啲，氣沖沖咁講唔准我放上去，仲眾目睽睽下兇神惡煞望住我30秒，搞到我無地自容，佢性格好霸道，唔想畀人睇下次就唔好着咁短！」

筱靖表示與黃集鋒毫無仇恨，對其行為感到無奈。

黃集鋒

筱靖則忍無可忍在電話上大反擊：「我多次禮貌叫佢刪相，點知佢仲當住大家面鬧我，覺得佢好過分、好侮辱我，又唔想喺大家面前喊先走出去，其實都唔想提，希望大家以大局為重，點知有人就搞呢啲八婆是非，施施然想踩住博上位！」而黃集鋒昨晚於微博透露已致電筱靖安慰。