龔嘉欣疑捲入桃色糾紛

無綫小花龔嘉欣（Katy）自去年跟鄧健泓分手後，感情生活一直兜兜轉轉，先後被指與許家傑、袁偉豪及沈震軒等撻着，而她亦曾透露多人追。然而，太受異性歡迎未必是好事，Katy本周一便在微博爆料指連日晚上被一名女子以電話瘋狂滋擾，更揚言可能為此報警，而最新消息指她疑因捲入桃色糾紛才受滋擾！

記者昨日聯絡身處佛山為劇集《守業者》拍外景的Katy，她表示對滋擾一事尚未報警，但不排除報警備案：「我電話飛咗線返內地，佢（滋擾女子）晚晚不斷打嚟講埋啲莫名其妙嘅嘢，我忍唔住先喺微博講呢件事，再係咁就會報警。」並透露根本不認識對方，但未有透露電話內容：「唯一嘅解決方法就係改電話，我唔知佢係邊個。（對方精神有問題？）唔知呀！」當問到是否與傳聞所指捲入桃色糾紛及搶人男友，她即堅決否認：「我夠膽講我絕對唔會做呢啲嘢！」Katy慨嘆藝人身份，對方容易透過其他渠道取得其聯絡方法，並指佛山天氣炎熱加上早出晚歸，滋擾行為令她難以休息。問到為何不關掉手機，她說：「第二朝工作人員會打嚟！（怕返港後騷擾會升級？）唔驚！其實只係小事，但搞到我有啲忟憎。」

姚子羚爆有猛男護花

Katy在內地晚晚慘被電話滋擾，作為好姊妹兼同居密友的姚子羚卻未有「八卦」，她說：「有喺微博見到，但未親口問佢，應該唔係好嚴重。」談到會否覺得對方如傳聞所指捲入桃色糾紛，子羚即力撐Katy說：「唔會！我好知佢性格，唔會做呢啲野。（佢有冇拍拖？）佢不嬲都多人追，靚女嚟嘛！」還笑言叫其他猛男保護她，問到可有好介紹時，子羚漏口風說：「佢有o架喇！」子羚又自爆曾被粉絲騷擾，故鼓勵Katy若感事態嚴重可報警。與Katy一起在佛山拍劇兼同房的小花樂瞳表示知道對方晚晚被電話騷擾，問到何有安慰對方？她說：「都有！（關桃色糾紛事？）都係得啖笑囉！」

另外，記者向無綫查詢Katy有否就電話恐嚇而求助，無綫高層曾醒明說：「有經理人合約嘅藝員可向經理人或藝員科反映，但暫時未收到龔嘉欣嘅求助，所以應該唔係好嚴重，如果收到會提供協助。」