李克勤事隔七年再推出發燒靚聲碟《復克》，昨日舉行簽唱會的他預告年底舉行《左麟右李》演唱會，令全場High爆！他又與歌迷模仿新碟封面的深情托腮Pose，及與「論盡」粉絲玩砌膠杯，實行「決戰一粒鐘」！

克勤為新碟不停托腮，娛人又娛己。

逾二百名歌迷「圍攻」克勤，他識做以靚聲回饋支持。

粉絲學克勤新碟封面的托腮Pose，唔知克勤收唔收貨呢？

克勤見粉絲砌膠杯時非常狼狽，即笑言「決戰一粒鐘」。

歌手李克勤昨日出席《屯門時代廣場李克勤《復克》簽唱會》，吸引逾二百名歌迷捧場，他向粉絲預告年底舉行《左麟右李》演唱會時，全場氣氛高漲！克勤其後唱出發燒靚聲專輯《復克》中的《沉默的眼睛》及由黃偉文填詞、尚未推出的新歌《紙牌屋》，讓歌迷先「聽」為快！

期間克勤與現場觀眾大玩遊戲，他先示範專輯封面的托腮動作，再由現場歌迷模仿，他們亦模仿克勤以往專輯的封面Pose，其中一位歌迷將雙手舉向天，做出類似拍纖體廣告的動作，克勤即笑說：「我唔係譚詠麟喎！我有呢個封面咩？撞鬼囉！」其後在司儀提示下克勤才如夢初醒，知道歌迷模仿的是1994年推出的專輯《希望》。

而另一個遊戲是參照克勤主持的《決戰一分鐘》，歌迷以膠杯堆砌出金字塔，見歌迷雞手鴨腳，克勤即笑言是「決戰一粒鐘」。

大賣分花紅

克勤受訪時透露專輯銷情理想：「賣得幾好，應該有花紅分，《復克2》都話想出喇，但我又唔想成日淨係翻唱變咗做口水歌手，但真係幾好賣！」對於前晚曾志偉為港姐準決賽作部分錄影時爆粗，「星級選民」之一的克勤說：「志偉間唔中都有呢啲助語詞，識佢咁多年嘅都習慣，但尋晚（前晚）個咪唔應該畀傳媒聽到，始終係鏡頭後嘅嘢，好彩我同叻哥（陳百祥）都只係講腳毛，如果咁啱對港姐評頭品足又大做文章。」