張名雅精彩充實 朱千雪得多過失

去年奪得香港小姐冠軍的張名雅因受「Down Server」事件影響，雖然贏得后冠，但無辜地承受輿論壓力，冠軍資格備受質疑。然而，這卻是難得的人生歷練，令她變得成熟。

將卸任的張名雅指過去一年港姐生活精彩充實：「諗番起選港姐嗰陣仲係新人，唔識得面對壓力，經過參選嗰幾個月，就好似上咗速成班咁，學識咗調節心理，將壓力變成對自己有要求嘅動力。其實冧機事件唔係好大壓力，因為新人仲未知咩叫做壓力，反而後來參加華姐、《星夢傳奇》自己會畀自己壓力，壓力相對大好多，經過呢一年見識多咗，自己覺得就好似行上咗由小朋友變成大人嘅路途上。」

過程最重要

問到若能重新開始會否參選香港小姐，還是選擇做個平凡人﹖她坦言參選香港小姐改變了一生，若沒有參選，現可能會在辦公室返工，過着朝九晚五的生活，自己亦不會有突破：「自己入咗行一年，覺得好鍾意娛樂圈，可能係自己性格怕悶，鍾意同人溝通，想生活過得多姿多采，如果再揀過都一定會再選，其實輸贏真係唔重要，過程先係最重要。」

過去一年，身為冠軍的張名雅被指發展不及未卸任已經有劇拍的季軍朱千雪，張名雅說：「我戥佢開心，但係唔會同人比較，我哋係好朋友，同埋好信任公司安排，之前公司都安排咗我參加《星夢傳奇》，自己覺得係好難得嘅機會畀觀眾認識我，公司安排緊我做主持，希望可以擦出火花，其實參加港姐就好似參加短跑比賽，而加入娛樂圈就好似參加馬拉松長跑咁，自己會努力嘗試。」

參選港姐時，張名雅飛上枝頭，但在《星夢傳奇》則低分出局，當晚表現失準兼喊爆的她說：「嗰次自己係第一次上台唱歌，係好大壓力，當晚其實係個耳機有小小問題，聽音樂唔係咁清楚，下次會醒目啲，識得執生。」她指當晚爆喊並不是因為出局，而是被歌詞感動。

最難忘真人騷淘汰

談到參選港姐最難忘的一件事，原以為是「Down Server」事件，張名雅卻說：「最難忘係倫敦拍外景，因為港姐40周年用真人騷形式拍攝，佳麗着泳衣互相比併淘汰，既係良性競爭，大家亦因為有共同經歷，可以從中建立友誼。」至於「Down Server」事件，她坦言當時腦內一片空白，故印象不深。

香港小姐季軍朱千雪同樣是「Down Server」的受害者，她是觀眾心目中的「冠軍」，后冠幾乎已是囊中物，但改由大會評分後變成季軍。不過，世事難料，朱千雪沒有后冠的光環束縛，反而能輕身上路，過去一年在得獎港姐中率先彈出，主持《勁歌金曲》，以及拍攝重頭劇《On Call 36小時Ⅱ》，最近又周遊列國拍攝旅遊節目，寓工作於娛樂，事業發展明顯比冠軍張名雅順利。

朱千雪很滿意過去一年的發展，甚至覺得自己相當幸運，對於后冠擦身而過，她坦言過了一年再回想也沒有遺憾，因為所得確實比預期多，感覺已經相當完美：「過去一年過得好充實，超越自己想像，好似做主持、拍劇，最近仲去埋拍旅遊特輯，呢年過得好濃縮，已經好滿意，覺得好Perfect（完美）。」

開心過以前

經過忙碌及多姿多采的一年，朱千雪覺得由外到內都有轉變：「如果唔係參加選美，就唔會的起心肝減肥，自己一直都唔覺得有問題，直到參選要着泳衣見傳媒，先知道自己原來唔Fit，由嗰一刻先決定要減肥，之後個幾月減咗13磅。」

由小肥妹變成窈窕淑女的朱千雪，心智也急速成長：「未入行前唔會去諗嘢，可以話冇乜煩惱，但唔代表冇問題，只係會避過問題。但呢一年就改變咗，要去面對、解決問題，同埋對自己有要求。自己一向係簡單開心嘅人，經過呢一年轉變，感覺比已經好開心嘅以前更加開心。」

由主持、拍劇到做旅遊節目，朱千雪覺得工作過程令她重新認識自己：「好似以前會覺得自己好細膽，但拍旅遊節目就話畀自己聽要豁出，試過坐花式軍機、潛水、又玩埋鋼索，以前驚自己做唔到嘅嘢，試過之後發現自己原來唔係咁驚。」

贏嚴父讚賞爆喊

在加拿大長大的朱千雪有位要求嚴格的爸爸：「Daddy一向都好嚴格，好似考試攞95分，佢會問點解唔係100分，Daddy從來都未讚過我。」千雪奪得港姐季軍，但似乎所得的榮譽也不及父親的讚賞電郵珍貴：「選完當晚收到Daddy一封讚賞電郵，咁大個女Daddy第一次讚我，一路睇一路喊，呢封信依家都放喺電話裏面隨時攞出嚟睇。」

後記：互相提點冇心病

去年港姐決賽發生「Down Server」，后冠誰屬出現爭議，張名雅與朱千雪一直被認定有心病。訪問當日，兩人在鏡頭前後均有傾有講，拍照擺甫士時大家不時互相提點，關係似乎遠比外間想像的好得多。