視而優則演的蔣家旻與拍檔馬志威日前獲邀擔任《娛樂onShow》嘉賓，蔣家旻透露曾因馬志威勇救她而「愛上」對方，還自言是鄧萃雯和佘詩曼的混合體，同樣熱愛演戲兼夠硬淨！

熱愛演戲的Angel，自小已渴望成為演員。

蔣家旻（Angel）與馬志威（Edward）日前在《娛樂onShow》接受訪問，分享他們對新片涉及男女關係及被迫接客的內容感受，Edward大方表示不介意現實中的伴侶並非向自己獻出「第一次」：「係唔係第一次我就唔係好介意，但我會介意生活中嘅女朋友走去做嗰啲嘢（接客）。」Angel亦說：「冇得介唔介意，依家社會風氣唔同，最緊要另一半對自己忠心同專一。」而Angel還向主持俞詠文（Angela）透露曾因Edward勇救她而愛上對方：「我覺得有一刻鍾意咗戲中嘅Edward，因為有一幕我要着住高踭鞋喺街跑搵佢，點知拍拍吓，我真係扭傷咗隻腳，導演一嗌Cut，佢就即刻衝過嚟扶我起身，真係好Hero！」雖然Edward聽完即冧爆，但仍謙虛地說：「優點唔好講！」

自覺似鄧萃雯愛演戲

此外，曾在多套電視劇中扮演「少年版」田蕊妮、佘詩曼、鄧萃雯及羅蘭等角色的Angel，向Angela表示覺得她最似佘詩曼和鄧萃雯：「其實雯女有話過我似佢，佢話我同佢細個嘅演繹方式好似，我覺得雯女做戲好叻，同時我亦都好醉心演戲，細細個就已經好希望大個咗可以做演員，所以我諗對演戲嘅熱愛同佢有啲似！而我亦都覺得同阿佘嘅硬朗性格幾似。」