外形高大硬朗的魏駿傑,原來竟是怕老婆的「小男人」,他又自爆原本性格孤僻火爆零交際,直至三年前囡囡的誕生,而令他徹底改變乞人憎的性格,他說:「想追多一個女!」

魏駿傑透露現在的收入,是當年的數十倍。

魏駿傑自爆很怕老婆張利華,她一黑面即怕怕。

魏駿傑有女萬事足,更希望再追多一個女。

性格孤僻火爆的魏駿傑,因妻女令他變得開朗健談。

俗語有云:「怕老婆會發達!」近年轉戰內地的魏駿傑,似乎印證了這句說話。雖然傑仔曾被指離開無綫後,工作、收入大不如前,但他透露現時的收入是當年的數十倍:「以前我唔識交際,由細到大性格都好孤僻,喺無綫十幾年都搵得唔多錢,就係因為我唔識討好經理人,所以佢有好多Job都唔預我,有人氣都冇用!所以我就決定試吓返內地發展,我現時收入係當時嘅幾十倍!雖然要喺內地周圍飛去登台,好辛苦好攰,但只要諗起老婆同個女就好有動力。」愛家庭的他,早前更斥資九百多萬港元在九龍城購入一個單位,務求囡囡將來可以進入名校網,認真「廿四孝」!

盼望追多一個女

外表是一名硬漢的傑仔,更自爆「怕老婆」:「可能係糯米治木蝨,以前拍咁多次拖,雖然開心,但都冇一個女朋友治到我,只有老婆就真係治到我!自從佢幫我生咗囡囡後,我就更加聽佢話,只要佢一黑面我就驚!」有女萬事足的他又說:「自從有咗囡囡後,我亦改變咗以前孤僻嘅性格,變得開朗健談,而且對得囡囡多,性格亦冇再咁火爆!」他更聲言要追多個女:「囡囡真係好貼心,我想生多個女,咁將來就有兩個女孝順我啦!哈哈!」希望他可以達成目標啦!