「Jessica C.師妹」楊琳（前名楊柳青）嫵媚煞食，不過原來她「硬」在骨子裏，不甘讓男士專美的她，一心一意恨做打女，誓要成為打女界大家姐！

穿上Bikini的Wiyona大晒長腿，完全看不出她「硬」在骨子裏。

Wiyona捱得又不怕辛苦，並希望升呢為打女界大家姐。

模特兒出身的楊琳（右）經常與師姐Jessica C.（中）出席活動。

穿上性感Bikini的楊琳（Wiyona），女人味盡出，單看外表便知是個當模特兒的好材料，但原來有「大隻青」綽號的她，一直恨闖電影圈，一心一意挑戰做打女：「我啱啱讀完一個演藝課程，當然有興趣喺電影界發展！（想做哪類型角色？）我想做打女，因為我覺得女仔識打功夫好有型，而且打起上嚟畫面都好睇啲，唔會咁靜態。」要做打女，有武功底子自然較着數，Wiyona亦深明此道，積極學打真功夫：「我之前就去學咗個『電影動作』嘅課程，女仔學功夫唔多唔少都會有瘀傷，其實有時係會影響咗Modeling嘅發展，不過自己都想爭取，想擴闊發展空間。」

自細「訓練」獨立

「大隻青」Wiyona如此捱得，全靠成長環境「訓練」而來，身為家中長女的她，當然要夠硬淨：「我唔怕辛苦，屋企又唔係咩有錢人，加上自己係大家姐，由細到大樣樣嘢都要親力親為，所以我依家好獨立，工作時我可以唔需要助手，做起嘢上嚟又可以Helpful啲，人哋又唔使照顧我。」