影壇新人馬志威曾與多位當紅歌手拍MV，被喻為關楚耀及柯震東等型男的混合體，他甫殺入大銀幕即擔正，與無綫小花蔣家旻有不少感人催淚戲，上位在望！

Edward型仔又傻氣，貌似多位型男的他希望凸顯個人特質，被觀眾記得。

Joey及Kary亦睇中Edward，合作拍MV。

Kary（左）

Edward在處男作中與Angel有不少「激戰」場面。

外形高大俊朗的男模馬志威（Edward）模而優則演，近年不停有幕前演出，先後被天后容祖兒（Joey）、古巨基及吳雨霏（Kary）睇中拍MV，加入影壇不久，最近又成為葉念琛執導的《第一次不是你》男主角，令人羨慕。

Edward在鏡頭前可謂「雙面人」，Chok樣時十足憂鬱小生，有笑容時則是陽光大男孩，他承認性格兩極：「唔開心時好自閉，興奮時玩得好癲，相熟朋友都知我係大細路，鍾意打機同砌Lego！」對於被指貌似關楚耀、沈震軒及柯震東，他笑言受寵若驚：「個個都靚仔，但我想有自己嘅特質。（咁快做主角，心情點？）絕對係夢想成真，多謝葉導演畀信心我，話睇咗啲廣告同MV，覺得我有天分。」

願為愛人賣腎

Edward與無綫小花蔣家旻（Angel）在片中飾演青梅竹馬的情侶，並有兩場大膽親熱戲，Edward笑言Angel是前輩，幸獲對方指點：「但拍床戲大家都好緊張，要導演心理輔導，好在Angel信任我。」提到片中Angel因籌錢做私鐘妹而失身，Edward不諱言現實生活會盡力幫女友：「就算賣腎，都唔想鍾意嘅人受傷害！」