區文詩與老外男友展開一趟越南「裸」命之旅，自小夢想裸泳的她終於在五星級度假屋裏圓夢，在私人泳池三點盡露享受天體浴，更由男友操刀拍攝裸照，誓要Hot爆越南！

着上三點式的Angela，大騷美好身材。

Angela與男友於越南度假，大飽口福。

Angela在越南盡情享受日光浴，回港後卻發現皮膚敏感。

區文詩（Angela）與意大利金融才俊男友Peter早前感情昇華至同居階段，不過兩人各有工作在身，一直未能抽空出埠歎世界。不過，Angela日前終與男友夾到檔期，齊齊展開一趟四日三夜的越南峴港之旅，並入住五星級度假村式酒店，她說：「好耐冇放過假啦！今次真係想休息享受吓，等自己放空，發吓呆都好。而呢間酒店係我一直都夢寐以求入住，因為出名靚同舒服，仲有個私人管家服侍我哋。」

被誤會越南同鄉

但最寫意的是度假屋坐擁私人大泳池，一直夢想裸泳的Angela終得償所願，她說：「平時香港咁多人，我今次終於放心喺泳池裸泳，自細都夢想要裸一次！」問到男友可有「陪裸」？她表示男友充當攝影師：「佢做攝影師幫我影相，唔擔心佢會亂畀人，因為啲相喺我電話。」

她指大部分時間都留在酒店享用設施，問到可有趁機「造人」？她說：「冇啦！我暫時唔想造人住呀！」而Angela出發到市區「濕平」前更有備而來，先向管家學識幾句講價越南話，最後更被當地人誤以為是同鄉，逃過被「劏」命運。曬黑回港後的Angela更發現皮膚敏感，要急做Facial補救靚樣。