被網友封做「Mag BB」的林欣彤形象清純,最近轉玩金髮術似乎反應麻麻,她會順應民意盡快還原基本髮,又爆好友胡鴻鈞「蝦」小朋友,認真抵打。

染了一頭金髮的Mag BB,將順應民意盡快還原基本髮。

Mag(左)與Ella並排合照,身高明顯差一截!

Mag和胡鴻鈞在台上與小朋友玩遊戲時,十分雀躍。

Mag和胡鴻鈞出席活動時,取笑他蝦小朋友。

林欣彤(Mag)日前以一頭金髮出席活動與小朋友大玩遊戲,對於有網民不接受她的金毛造型,覺得不襯她,有損「Mag BB」玉女形象,Mag說:「原來佢哋係咁諗。」她立刻安撫粉絲,並表示拍完MV後會盡快還原髮色,她也覺得金髮很難配襯服飾。對於有指這個金毛造型貌似何家千金何超雲?她驚叫:「吓!竟然,我完全冇諗過。」

冇諗過似何超雲

Mag透露在新MV中要跳舞及做體操,其實以前她亦有跳舞,不過因多年前跳傷後,沒有再繼續跳,她說:「喺MV我有一個高難度動作係要凌空360度轉體,我係要Chok個身,好彩都應付到,冇想像中咁難。」

同場的胡鴻鈞(Hubert)則透露新碟會提早推出,皆因早前他為劇集唱主題曲後,公司希望能夠乘勝追擊,他又指慶幸翻唱何韻詩的金曲後,好評居多:「我預咗會比較,阿詩喺微博轉發咗首歌,仲叫我加油。」當日他們在台上與小朋友玩遊戲,Hubert更不停撩一對男女小朋友玩耍,嚷着兩人互搣耳仔,但兩個小朋友不肯就範,最終玩遊戲輸了,Mag與主持都取笑他蝦小朋友。

另外,Mag與官恩娜(Ella)昨日一同出席活動,穿平底鞋的Mag立即變了小矮人,她笑說:「我都想增高,不過冇o架喇!拉多啲筋囉!其實我發現大合照時我矮咗落去,反而更突出!」而Ella則自爆曾被女友人突襲搣下巴:「佢話驗吓係咪真!好彩係真材實料,唔係畀佢搣甩都似!(下次驗胸點算?)呢個Size一定係真啦!」