DaDa選擇性開工 被轟無操守

大前日陳靜（DaDa）在微博自稱因情緒問題，宣布要退出幕前，並缺席前日活動，面臨被追討千萬元毀約賠償。其經理人施念慈、《喜愛夜蒲3》監製伍健雄及導演錢國偉，至今仍未能聯絡DaDa，但昨日驚聞DaDa秘密為導演彭浩翔新戲開工，加上傳出她「閃退」乃嫌《夜蒲3》中戲份不及雨僑多，並不願與蕭美卡（Mika）、郭穎兒（Celia K.）及「寸嘴Barbie」夏尉喻等同場，令伍健雄及錢國偉扯火狂轟，質疑對方的演員操守及合約精神何在。

據知DaDa昨日秘密開工，皆因彭浩翔昨早致電「失蹤」的DaDa，竟獲對方接聽及答應開工，但現場所見DaDa情緒仍不穩定。記者向DaDa經理人施念慈查詢時，她承認彭浩翔告知才知DaDa開工。不過當記者致電彭浩翔求證時，他卻不置可否，並迴避問題：「我開緊第二套戲，其他嘢唔清楚。」而今日DaDa原要為《夜蒲3》開工，但因失去聯絡而令進度延誤，昨日錢國偉在電話中，狂轟DaDa處事手法極有問題，傳DaDa嫌戲份少「逃拍」，他激動地說：「當日佢（DaDa）主動求拍，所有嘢一早傾好晒！佢睇咗劇本先開鏡，但事隔一日就話情緒病唔拍，莫名其妙！」對於DaDa拍攝另一齣新片，他勞氣地說：「如果佢有病點解開工？咁即係冇病啦！即係揀嘢做啦！」

刪除戲份

錢國偉愈鬧愈激：「呢種工作態度冇職業操守！何況戲份有問題，可以當面傾，唔係走咗去！我哋唔係逼良為娼，部戲2級半可以有幾激？」對於DaDa表示人言可畏及辛苦，他說：「其實佢入行有幾耐？有幾辛苦？攞咗獎就嗌辛苦，有幾多人捱咗幾十年都冇獎拎，辜負晒賞識佢嘅人！」他表示施念慈已為DaDa失蹤致電道歉，又透露會刪除DaDa的戲份，而本來飾演DaDa老公的王宗堯，亦無辜被牽連，其角色亦被刪除。而伍健雄在電話中坦言火起：「我都扯火！搞到依家都開唔到工，都追究緊但都搵唔到佢！（要求賠償？）會！交畀律師處理，因為呢啲係演員基本責任，冇晒合約精神。」他透露原訂今日DaDa需為電影《重口味》出席謝票活動，但已預期對方繼續甩底。關於戲份少，施念慈說：「DaDa有問過點解佢戲份比雨僑少，我亦咁樣問過監製。」她坦言得知對方秘密開工感到極為失望：「有乜嘢唔可以同公司商量，如果身體唔舒服，我可以安排過，唔會逼佢做。」

師妹爆料

對於DaDa嫌《夜蒲3》戲份少，其師妹Celia K.坦承此事：「大約一個月前DaDa有打畀我傾，話點解戲份比雨僑少。（佢語氣激動？）係好激動，佢話唔想咁少戲份。」而有指DaDa睇唔起同門師妹，Celia K.語帶無奈說：「可能大家Level唔同，女配角嘛！佢攞過獎！」另外，有傳DaDa「閃退」，是因拍拖並有龐大靠山，但據知情人士指她其實既冇拍拖亦冇靠山，她目前只選擇性接電話，失蹤期間都是在家閉關，只是情緒不穩，而採取逃避政策。