春卷單方面飛李思捷

李思捷與春卷拍拖數年從未正式公開承認戀情，但兩人一起已是公開的秘密。雖然男方不時傳緋聞，但春卷「正印女友」的地位始終未受威脅。不過，向來甚少談論感情的春卷昨日出席活動時單方面宣布分手！

有一陣子未有公開露面的她被問到是否只顧拍拖？她說：「我冇拍拖，專注工作。（同李思捷分咗手？）唔回應。（你哋變番朋友？）We are still really good friends。（因了解而分開？）每段關係都有自己嘅問題，不過係我哋嘅事，唔想講。（佢太多緋聞？）不嬲都多。（你哋唔再係情侶關係？）一直都係Very good friends。（你單方面宣布分手？）其實我哋不嬲都唔講。（思捷冇話你哋分手？）佢想做咩佢自己做決定。」並一再重申現時是單身，沒有拍拖。提到性感女星張暖雅日前流出裸照，她說：「大家要小心啲，就算係自己人，以為最親嘅人原來最後會出賣你。我冇講邊個，例如朋友。」

慘遭「鬼剃頭」

另外，她早前接受本報訪問時透露，半年前曾因家庭、工作及私人問題等壓力出現「鬼剃頭」的脫髮現象，她當時有告知家人及李思捷，現已康復。

男主角李思捷昨日出席另一活動，記者提到春卷表示單身冇拍拖，與他只是好朋友，他反問記者：「佢咁講呀？」似乎並不知情。記者再追問他現時是否單身？他說：「感情事我不嬲唔講。（你哋依家咩關係？）Very Special，我同佢嘅關係非常好，佢永遠係我身邊好Close嘅朋友，係好好，冇變過！我同佢喺感情上冇變過，係互相對大家嘅，但要講我嘅感情生活就唔可以。」

唔認花弗

其後，他大讚春卷是好女仔，給予對方200分。問到為何分手？他堅持不說感情事，問到春卷宣布分手前可有跟他溝通？他說：「佢講咩我都尊重佢，對於佢本人我係讚嘅，咁多年都好好。（以前有報道話你照顧佢？）話啫！佢不嬲叻女，自己接Job。（因為分手要靠自己？）唔關感情事，佢比實際年齡成熟。（係咪你太花弗畀唔到安全感？）唔覺自己花心。（畀唔到承諾？）唔講。」最後問到可會祝福春卷找到好男友？他說：「搵到就會祝福。」

一手提攜春卷的錢國偉表示對兩人分手的消息感到愕然：「之前見佢兩個嘅相咁Sweet，如果真係分手就有啲可惜。（你撮合佢哋？）唔係，佢哋喺曾志偉個生日會度識嘅。」李思捷好友單立文得悉春卷宣布回復單身後同樣大感愕然：「吓？好突然，我完全唔知，等我了解吓同消化吓先再回應。（覺得可惜？）等我消化吓，有嘢講先再講啦！」