Bosco摸手親「香」澤

黃宗澤去年跟胡杏兒甩拖後一直緋聞不斷，先後跟周麗淇和林穎彤傳緋聞，上月更有傳因拍新劇《貓屎媽媽》而撻着「宅男女神」岑麗香，這對緋聞情侶繼前晚不避嫌出席新劇煞科飯局後，昨日又「情侶檔」孖住出席活動，「奉旨」日見夜見。而香香對跟Bosco傳緋聞的態度亦有所保留，似是想為「戀情」留後路！

兩人昨日跟吳千語、苟芸慧等在銅鑼灣出席ESTEE LAUDER活動，香香穿上Deep V貼身裙晒曲線身形及輕露事業線，甚有睇頭，可惜坐下時不慎春光乍洩，而千語、苟芸慧也不能幸免，同一命運。台上的Bosco在香香手背上滴上修護露再輕輕按摩輕捽手仔，Sweet到爆！活動末段，大會本來安排四位男女模特兒上台，讓嘉賓在他們胸前戴上徽章，跟香香同台的Bosco本來被分到替女模戴徽章，但為免尷尬而拒絕，大會司儀即識做地轉換男模給Bosco完成「戴章」儀式，他如此刻意謝絕女人埋身，認真識做！

肉緊解圍

香香事後接受訪問，問到她是否傳緋聞後首次出活動，她直認不諱，至於有沒有感尷尬，她指當Bosco是「哥哥」：「大家冇乜嘢，只係拍劇用劇照去報道就傳緋聞，我當佢係哥哥，佢當我係妹妹！」在旁的Bosco亦代對方解圍：「有乜尷尬？係朋友！」她又表示沒因情侶檔接Job而增加酬勞：「我哋係哥哥同妹妹。」Bosco立即說：「唔好令人覺得我老咗！」

至於被Bosco按摩時有沒有「心跳的感覺」，她雖說沒有，在旁的Bosco即插嘴說：「冇就死啦！（指心跳）」她又謂拍劇已預了傳緋聞，談到怕不怕緋聞會嚇退追求者，她說：「我覺得感情係神安排。（Bosco形容你做妹妹，冇當你女神，會唔會感到傷心？）唔會，我都冇當自己係女神。」Bosco又插嘴兼力撐說：「同佢拍劇，一大班人相處時，佢都冇當自己係女仔，佢性格好爽，係男仔頭！」

自嘲老模

其實香香不足二十四小時前已跟Bosco見面，二人前晚與古明華等出席無綫新劇《貓屎媽媽》煞科宴，問到拍劇過程辛不辛苦，香香坦言四字成語是她「最大敵人」及經常要NG：「都辛苦，戲入面好多咖啡用字同地道對白。」問到Bosco是否最照顧她，她說：「佢好似大哥哥咁，但成日都笑我啲口音，不過都有幫我糾正番！」而Bosco則說：「八月尾要開工，又忙緊為餐廳搵舖頭。（幾時開業？）9月尾、10月啦！想裝修靚啲先開張。」提到早前有男模出寫真，他指沒留意，又自嘲是「老模」：「唔好搞我喇！（對身形冇信心？）我之前都拍咗健身廣告。（八舊腹肌？）唔係啦！要做張家輝嗰隻好辛苦。」

岑麗香 VS 胡杏兒

姓名：岑麗香

年齡：28歲

身高：1米64

身材：33C、23、33.5

事業：2010年國際中華小姐冠軍，去年憑劇集《巴不得媽媽……》獲封「宅男女神」，同年台慶頒獎禮中更奪得三項提名，可惜最終三飛不中食白果。

姓名：胡杏兒

年齡：33歲

身高：1米72

身材：32.5B、23、33.5

事業：1999年香港小姐季軍，2002年憑劇集《流金歲月》奪得「飛躍進步女藝員」，2011年登上事業高峰，勇奪「我最喜愛的電視女藝員」和「最佳女主角」兩個獎項，成為雙料視后。