城城挑戰極限水舞王者追求完美
「舞台王者」郭富城昨日化身「水舞王者」出席澳門新濠天地舉行的《水舞間》昂然邁向三周年全球最精彩絕倫之探索體驗營啟動禮，成為首位登上水舞間劇院、親身體驗《水舞間》精彩項目的明星，穿上西裝的城城駕駛花式電單車風馳電掣型爆出場，城城渴望能與大會合作，舉行一場「水舞間Vs舞臨盛宴演唱會」，他說：「想揸住電單車飛越25呎高空。」
城城駕花式電單車型爆出場。
城城（後排右三）與表演者（後排）及來自中、港、澳、台的四地勇者合照。
專業「飛人」在17米高台上表演飛躍絕技，令人嘆為觀止。
三位勇者親身試玩15米高空飛躍。
澳門新濠天地《水舞間》為慶祝9月踏入三周年，這個全球最大型及最震撼之水上匯演，將舉行探索體驗營，並邀得「舞台王者」郭富城出席啟動儀式，城城昨日化身「水舞王者」駕駛花式電單車出場，並在會場兜了兩個圈，最後與多位表演者進行啟動禮，期間城城自爆沒有電單車駕駛執照：「媽咪唔畀考，自己拍戲揸過，不過已經有三年冇揸電單車。」大會亦宣布城城是首位登上水舞間劇院兼親身體驗《水舞間》精彩項目的明星。
20億打造舞台
多年沒有揸電單車的城城被問到會否生疏？他說：「冇，因為現場有特技專家教我。（有買保險？）應該有，自己今日動作好簡單，唔係高難度，不過好爽，馬力非同小可。」對水舞間表演瞭如指掌的城城說：「我頭先揸嗰架電單車同平時嗰啲唔同，係水舞間用嚟表演嘅花式電單車，好大馬力，如果唔小心好易打觔斗，今日真係大開眼界，睇到舞台嘅結構，知道要超過20億港幣打造。」問到會否用作演唱會參考？他說：「自己演唱會舞台都係用一億港幣，水舞間係我20倍。」專業的他經常給樂迷新鮮感，每次開騷都自我挑戰，問到是否想挑戰飛車？他說：「想揸住電單車飛越25呎高空，同喺25米高台跳水。」
世界級大師設計
城城坦言希望9月再到現場：「好想識個藝術總監Franco Dragone，佢係世界級舞台設計大師，都想拜佢為師同合作，希望有機會同全場90位表演者合作，搞番場『水舞間Vs舞臨盛宴』演唱會。（搵你開騷好貴？）梗係，呢個係一個挑戰自己理念，係舞台搵突破位。」隨即表示愛上大會其中一個「人體水晶燈」表演：「我睇完嘆為觀止，都想喺水晶燈入面唱歌，唱完就跳落水，幾好效果。」
孝順仔的城城強調不考電單車牌是為了母親，他說：「媽咪覺得危險，其實有次出席活動，有電單車廠商送咗一部畀我，本身諗住擺係屋企當藝術品展覽，點知唔夠位，最終擺喺停車場。」對於有傳他與內地女模葉熙祺撻着，城城多次以「唔回應」作答。
