「雨神」祖藍Fing晒手扭晒腰咁跳停雨舞，連個天都畀面佢，即刻停雨！

王祖藍Chok爆客串新片，半裸與女模鴛鴦戲水，雖然艷福無邊，但險些凍死的他直言無福消受，認真慘情。

「雨神」祖藍Fing晒手扭晒腰咁跳停雨舞，連個天都畀面佢，即刻停雨！

成班靚女一齊跳落水，何其壯觀！

祖藍大搞氣氛，氹得一班師妹勁Happy。

王祖藍抽空兩天，客串英皇新片《超級經理人》飾演富豪，劇情講述他與「經理人」杜汶澤旗下的女模於泳池春色無邊，祖藍挺胸收腹大擺「誘人甫士」，令拍攝現場笑聲連連。祖藍昨日接受電話訪問時說：「我借用咗謝霆鋒同林峯初出道嘅Chok爆舉動，雖然只係客串，但都唔想欺場，仲要為藝術犧牲，有幾可見我咁性感呢？（唔怕女友李亞男呷醋？）只係做戲，佢冇乜所謂。（掉番轉呢？）咁又唔得喎！我習慣咗寬己嚴人。」

鏡頭前左擁右抱的祖藍，自爆拍攝過程辛酸：「嗰日得13、4度，凍到打冷震，好彩泳池隔籬有個桑拿房，可以跑去暖一陣。」而拍攝中途曾下雨，祖藍不想影響拍攝進度，帶頭跳停雨舞，最終竟放晴，大家即為他起花名為「雨神」。

獻唱挑戰最低分

另外，祖藍前晚以嘉賓身份亮相《星夢傳奇》錄影並獻唱，自言表現失準的他，事前受訪時笑說：「我見鄭俊弘咁高分，想挑戰最低分紀錄。不過評判中好多個都係Friend，我驚大家手下留情囉！」最終參賽者林子博被淘汰出局。