吳千語：冇計劃結婚

吳千語、連詩雅（Shiga）和周柏豪昨日齊集澳門威尼斯人購物中心，出席「澳門金光名區＜愛在仲夏＞活動」，吸引大批Fans逼爆會場，即場獻唱的柏豪更恍似開個人演唱會般，走勻四個角落與Fans握手，一度引起混亂。三人又在台上與Fans大玩遊戲，更有幸運Fans獲偶像餵食雪糕。

有傳千語BB一直恨做「峯嫂」，可惜仍未能通過林峯父母一關，最近有報道指她催男友交出時辰八字，讓麥玲玲師傅幫二人擇吉日結婚。昨日她否認借玲玲師傅向男友逼婚：「睇到報道我都莫名其妙，我係撞到玲玲師傅，不過只係傾吓閒偈，我唔信呢啲八字嘢，連自己八字都唔知，都冇算過命理。（話你哋下年唔結婚就分手？）正如我所講，呢啲嘢唔需要信晒。」

餵柏豪食雪糕

問到千語可會希望早婚，她以工作為由，表明不急於做「峯嫂」：「冇諗過，短期內未有打算。（有同林峯傾過結婚？）大家都未有計劃結婚，忙做嘢先，嚟緊我有兩套電影要拍。」她又大讚柏豪唱歌好聽，問到林峯可曾單獨向她唱情歌？她笑說：「冇喎，佢演唱會唱過畀大家聽啦！我鍾意聽柏豪唱歌多啲！（邊個好聽啲？）都好聽！」

同場的柏豪則表示明年會開紅館個唱，正準備積極操Fit：「下年暑假開，依家要開始操o架喇！個台大咗，啲肌肉都要大舊啲、線條要深啲，唔想畫啲肌肉出嚟！」Shiga亦搭嘴：「其實女仔都會想要腹肌，起碼4舊啦！我都搵咗私人教練！（怕唔怕練到冇埋上面嗰兩舊？）我不嬲都冇嘅！」她又笑言要請教柏豪如何操大「胸肌」，柏豪即大笑說：「我唔知喎！答到你我就去做健身教練啦！」他在台上更獲Shiga和千語餵食雪糕，可謂艷福無邊。