DaDa舊愛垃圾堆啜女

前無綫藝員李雨陽（Eddie），早前轉投王維基旗下後，曾被拍得與DaDa同遊主題公園而爆出戀情，後因性格不合分手收場。甩拖後的Eddie變得喜愛夜蒲獵女，日前與數名男女友人到尖沙咀一間酒吧消遣，期間眾人邊猜枚邊劈酒，冧女有一手的Eddie，氹得女友人不時哈哈大笑，當中與「港版AKB48」、女子組合Super Gear成員Milky（梁婉微）特別好傾，頻頻咬耳仔。

凌晨時分，眾人飲至半醉，Eddie突然拖住穿黑色背心短裙的Milky步出酒吧，他在門外左望右望一輪，即拖着女方入後巷，現場擺了大量紙皮箱、一袋袋垃圾及啤酒樽，他將Milky壓在鐵閘，兩人對望一會，Milky主動伸雙手箍住Eddie頸項，繼而激咀。四唇交戰數分鐘後依偎一番，Eddie邊抹去嘴角的口水才返回酒吧。

女：互有好感 男：唔認咀過

對於舌戰斷正，Eddie昨日接受電話訪問時竟擘大眼講大話，他先是口窒窒說：「唔係咀，係咪嘈得滯哄埋傾偈咋？」當得悉斷正地點是人迹稀少的後巷時，他即強辯：「當晚有啲唔開心，搵Milky去靜啲嘅地方傾偈。」又否認有攬錫：「唔會喺街度做呢啲嘢，係都返屋企做！」他只認Milky是朋友，更否認有意追求：「依家單身，想事業為重。」Milky卻明顯未夾口供，接受電話訪問還甜絲絲表示與Eddie是「互有好感」，雙方「了解中」：「新年嗰陣識，有私下約食飯。（佢大你十歲？）年紀唔係問題。」問到激吻後關係可有昇華？她說：「冇特別，大家忙，靠電話聯絡。（咀成咁仲唔係拍拖？）順其自然！」她又指夜蒲當晚雖然有飲酒，但意識清醒：「李雨陽之後有送我返屋企。（有冇下文？）冇！佢送完我就返屋企。」

李雨陽（Eddie）

年齡：34歲

簡歷：2003年憑無綫劇集《當四葉草碰上劍尖時》而為人認識，可惜發展多年星運平平，去年與無綫約滿後轉投王維基主理的香港電視，曾夥拍梁小冰等前輩拍《驚異世紀》，但事業暫未見起色。

梁婉微（Milky）

年齡：24歲三圍：32B、24、35

簡歷：去年加入女子組合Super Gear進攻樂壇，主要到內地登台搵真銀。