發哥拍床戲睇老婆頭
影帝周潤發(發哥)再拍港產片,昨日他出席電影開鏡時表現風騷,滔滔不絕貫徹幽默本色。見慣大場面的發哥被問到拍攝床戲時,他笑言沒有問題,但要過老婆大人一關,其後又封霆鋒做偶像,因結婚生仔樣樣快過人,場面搞笑!
發哥笑言當霆鋒係偶像,氹得對方笑咪咪!
大批傳媒到電視城採訪發哥,要出動保安員護駕。
發哥落手落腳幫手搬枱,絕無架子!
發嫂陪發哥出席活動,非常恩愛!
孟瑤留前鬥後大露背上陣。
發哥重返香港影壇,接拍由王晶執導及無綫有份投資的賀歲片《賭城風雲》,昨日他梳行「機長Sam哥」頭,與謝霆鋒、杜汶澤、內地女演員景甜、童菲及穿透視大露背裝的孟瑤等現身無綫電視城,出席盛大開鏡拜神儀式。首次踩入將軍澳電視城的發哥叫座力驚人,吸引逾百位中港兩地傳媒逼爆記者會,場面相當墟冚,而發哥更「Captain」上身,現場影大合照時更出手幫忙排位。
心情靚爆的發哥全程表現風騷,主動受訪時繼續發揮幽默本色,大放笑彈。拍過多部大作的發哥被問到會否想與戲中女演員有床戲,他笑言沒有問題,但出名是「愛妻號」的他指要先問准老婆大人陳薈蓮,他笑說︰「我冇所謂,但唔知周太點睇喎!」他表示已多年沒有正式拍過港產賀歲片,對上一次已是1988年的賀歲片《八星報喜》,難怪他今次接拍此片相當興奮!
點名讚「Cool魔」
其後發哥滔滔不絕,更拿霆鋒來開玩笑,直言對方是其偶像︰「佢係我偶像,如果唔同佢拍套戲,真係對唔住佢伯爺(謝賢)同阿媽(拉姑)。當年佢伯爺對我相當照顧,我都盡我嘅能力,睇吓恰唔恰到佢。」他又以「世叔伯」口脗指睇住霆鋒長大,笑言如今世姪已結婚生仔,搞到身旁的霆鋒尷尬地說︰「我離埋(婚)添!」發哥即追擊︰「嘩!仲快過我!」令全場大笑。
向來愛煲無綫劇的發哥品評無綫劇集及一班小生花旦,提到熱爆的《衝上雲霄II》,「電視精」發哥除讚靚人靚景外,又指劇中吳鎮宇演的「Sam哥」及張智霖演的「Cool魔」為偶像︰「兩個都係我偶像,有味道,係馬國明曳啲,周圍有女友,胡杏兒又做乜對個大佬咁呢?殺死人咩?」說時他又突然點名大讚在《師父‧明白了》中的「翠如BB」黃翠如演得不錯。對於王維基的「香港電視」仍未解決發牌問題,他說︰「遲早問題,應該多啲選擇畀觀眾。」
被爆天價片酬
此外,繼電影《大上海》後再與發哥合作的王晶,受訪時未透露今次的投資金額,並指發哥片酬是天價︰「話唔係你都唔信啦!總之跟足荷里活,不過佢兩公婆好好,冇要求做足100分,80分已經接受。」對於杜汶澤指他對演員的片酬出手豪爽,他說︰「咁Budget可以,做乜要揼自己啲朋友。」他強調今次的題材與賭博關係不大,又指與無綫合作,但因發哥和霆鋒的檔期難遷就,故未有認真度過無綫一班花旦的檔期。