一向賺幾多使幾多的關楚耀,停工期間留守家中,以減輕家人的負擔。

關楚耀與麥家瑜這對師兄妹可謂「同命鴛鴦」,兩人都曾經歷停工兩年的苦澀期,異口同聲以「人生最低潮」形容該段艱辛日子,並承認曾萌生放棄念頭,但想到家人的不離不棄,加上唱片公司不斷給予機會,即令他們重拾自信,化悲憤為力量,前者將舉行處男演唱會,後者亦推出第二張專輯,難怪他們說:「機會嚟到要好好把握同珍惜!」

一向賺幾多使幾多的關楚耀,停工期間留守家中,以減輕家人的負擔。

麥家瑜感激朋友、歌迷及家人的愛與支持,並視之為再戰樂壇的推動力。

「同病相憐」的關楚耀與麥家瑜齊不言棄,勇敢跨越一個又一個的難關。

關楚耀為涉藏毒一事鞠躬道歉,並宣布暫別娛樂圈。(資料圖片)

曾與陳奕迅同台的麥家瑜,演出不比前輩遜色。(資料圖片)

麥家瑜、關楚耀

關楚耀(Kelvin)挾譚詠麟契仔之名殺入樂壇,獲公司力捧的他可謂要風得風,正當事業起飛之際,他卻於日本旅行涉藏毒被捕,事件轟動整個娛樂圈,Kelvin人氣即急速下滑,回港後,更因不敢面對市民而足不出戶,每日躲在家中的Kelvin直言一度想過放棄:「不停諗算啦唔好做呢行,都唔知點面對公眾同屋企人,不如返番加拿大生活,係一個逃避同解脫,但諗深一層如果要拋開事業、屋企人,勇氣要更大,倒不如將勇氣化為力量,重新再戰樂壇。」他亦感激公司的不離不棄:「自己錯失機會,唱片公司仍然畀機會我,點解唔做好佢同好好把握呢?」

我手寫我心

Kelvin透露「停工」期間透過歌曲發洩負面情緒:「嗰件事之後好唔開心,有幾個月唔敢出街,覺得自己犯錯冇面,又搞到屋企人,心情非常低落,自己又冇Job、冇嘢撈,成日留喺屋企掂住個琴同結他寫歌。」寫下大堆歌的他戰戰兢兢交給公司同事聽,想不到會換來出碟機會:「冇要求過可以出碟,只係將負面情緒發洩晒落啲歌度,令我驚喜嘅係Duncan(黃劍濤)聽完後話不如用你寫呢啲歌幫你再出碟,咁就造就呢隻碟嘅誕生,《一年》裏面有好多歌係自己寫,印象最深刻就係《一年》呢首歌,真係講嗰年自己嘅心情。」能夠獲公司支持再出新碟的Kelvin,坦言會珍惜及把握機會:「呢啲機會唔係成日都有,每一次嚟都要好好把握,經歷過低潮,喪失晒好多機會,好幸運呢兩、三年除咗有機會唱歌,仲可以拍戲拍劇做演員,雖然依家好忙,瞓得幾個鐘,但係非常開心同衷心感激所有嘢!」

閉關多「煮」意

出身小康之家的Kelvin從來沒有家庭負擔,當遇上手停口停的日子時,難免要開口問父母拿生活費:「嗰時戥屋企人辛苦,嗰兩年冇工作冇收入,全部支出靠之前嘅積蓄同屋企人幫手,真係留喺屋企唔敢出街,幫吓屋企煮飯洗碗,其實我嘅廚藝係喺嗰兩年練番嚟。」身為長子的他承認花家人錢有點難受:「話晒我係長子加上成廿幾歲,之前嗰幾年做嘢,有剩都會畀屋企人當零用錢,嗰刻唔知有冇機會從頭嚟過,唔知前路係點,咁愁仲要屋企人照顧,我係男仔會冇面,但屋企人無條件付出去愛自己,令我更加慚愧,呢個係另一個推動力,令我再一次企番起身!」

麥家瑜(Keeva)加盟環球即推出處女新歌,翌年以新人姿態角逐新人獎,雖然未能橫掃各大頒獎禮,但憑健康形象俘虜萬千少男及廣告商,可惜最終因唱片市道低迷及各種因素,令她被迫停工兩年,至今年初才獲公司給予出碟的機會,Keeva「苦訴」呆在家中的日子:「諗嘢好負面,覺得好大件事,會覺得好似世界末日咁,當時真係控制唔到,會喊,覺得咩都好似好失敗,出完一隻碟就冇喇!」她透露等待機會時曾遭人睇死:「真係冷言冷語,自己面皮薄唔話得,有啲人講說話好難聽,叫我唔好要屋企人擔心,屋企人係我嘅死穴,對我好重要,之後會諗,係喎,我咁落去會令屋企人擔心,同埋嗰啲人嘅說話同態度係比較差,令我自信心跌落谷底。」

追夢反傳統

Keeva強調能企番起身全賴家人、歌迷及公司,又感激開錄音室的父親不斷鼓勵:「之前都諗過放棄,好混亂,不如返加拿大讀書唔好繼續唱歌,之後諗起當日返香港唱歌時,爸爸畀咗一句好鼓勵嘅說話:『如果呢個係你嘅夢就去追啦!』連屋企人都畀咁多自由同信任我,自己點解要退同逃避?」她隨即大讚父親很型:「通常父母都覺得個女應該讀個乜乜學位,打份穩穩定定嘅工,反而爸爸會想我去追夢。」

處於人生低潮的Keeva不忘努力增值:「未有機會時要裝備好自己,一有機會就將Ready好嘅嘢放晒出嚟,所以嗰兩年跟音樂人學作曲、編曲、寫詞。」成功翻身打破「一碟歌手」的她更學懂感恩:「當年會覺得呢幾年乜都冇,失去好多,依家諗番原來得到嘅嘢仲多,更認識自己,音樂上學多咗嘢,同埋學識去感恩,其實公司一直冇放棄我,好鼓勵我,個個好錫我好支持我,好老土嘅說話,真係多謝晒!」

愧疚零收入

Keeva表示不想亂花父母的辛苦錢,故朋友邀請出席派對都不敢參與:「自己冇收入,真係靠屋企人畀錢,有時真係連Party都唔敢去,去咗覺得好對唔住父母,冇嘢做仲攞錢出去玩,同埋好少買衫,學識應用就用,唔想畀屋企人咁大負擔,但佢哋冇投訴我,我先至覺得內疚,無條件為我付出令我好難受。依家有工作會努力做好佢,雖然未得到經濟上嘅嘢,但佢哋會覺得我付出努力,仲開心過我畀錢佢哋。」

後記:沉默是金

筆者可以話睇住Kelvin及Keeva成長,兩人同屬少說話、做自己的人,從不為博見報而做出「奇怪」及「騎呢」行為!受訪當日現場充斥歡笑聲,全乃大笑姑婆Keeva,每當筆者取笑她時,她總是傻大姐般哈哈大笑,令筆者難以再奚落她!在此衷心祝福兩人往後的路順利平坦,以及好運會降臨兩人身上!