全場逾萬名觀眾要求學友上台，促成兩代「歌神」合唱！

陳奕迅25場演唱會前晚舉行第13場，獲偶像「歌神」張學友捧場，觀眾不放過機會起哄要求二人合唱，在群情洶湧下，學友焗住上台獻聲，兩代「歌神」手拖手對望合唱，台上、台下都咁冧！

全場逾萬名觀眾要求學友上台，促成兩代「歌神」合唱！

兩神拖手對望唱冧歌，似乎有點搞笑喎！

Eason冧爆地挨實學友，趁機抽偶像水！

趙學而趁機找學友合照，事後高呼「Lucky」。

黃又南（左）到後台探班，並豎起手指公大讚Eason。

陳奕迅（Eason）的《Johnnie Walker Eason's LIFE演唱會》前晚舉行第13場，其偶像「歌神」學友亦是座上客！學友早前笑言視乎個唱反應才決定是否欣賞，眼見加至25場仍有Fans呻冇飛賣，他終決定捧場，更身穿Sharp醒的螢光衫，非常搶鏡！

呼籲畀空間偶像

觀眾發現學友即起哄要求他與Eason合唱，Eason笑了幾聲後說：「大家稍安無躁！」然後對學友說：「我提咗你唔好着螢光衫啦！大家畀啲空間我偶像，唔好騷擾佢，佢今晚嚟睇騷，妄想680蚊就睇到Eason同學友合唱？嘿！如果唔係網上又會有人投訴唔公平！」但觀眾懶理他，繼續高呼學友的名字，即使Eason打算扯開話題，都被觀眾的呼叫聲打窒，他只好對學友說：「阿哥點呀？有咩回應？」此時學友在工作人員帶領下準備離場，他一邊走，Eason一邊揮手對他講拜拜。正當全場觀眾死心時，學友竟突然出現在台上，Eason即抵死地說：「真係慘，睇騷都畀人拉上台！」

一身螢光衫吸睛

幸好學友未有介意，還笑說：「其實我等咗你請我上台好耐，我着螢光衫嘅目的就係想你睇到我，我聽到電台啲人話你唔舒服，所以特登嚟睇你，原來呃人嘅，你仲唱得咁好，咁我就放心喇！」其後，兩代「歌神」合唱《每天愛你多一些》，又不時手拖手對望，Eason還挨在學友的膊頭上，十足小Fans般冧到震！

除學友外，當晚睇騷的圈中人還有趙學而及黃又南等，其中學而趁機搵學友「集郵」，並在微博大呼「Lucky」！