腹部微凸的朱茵被影到與老公黃貫中於中環睇婦科醫生。

朱茵自去年為老公黃貫中(Paul)誕下愛女叉燒包後,不時把女兒的生活照放上微博分享,眼見女兒愈大愈得意,兩公婆亦有意追番個仔,日前Paul與腹部微凸的朱茵於中環睇婦科醫生,Paul未有理會記者問題,小心翼翼拖住老婆。

腹部微凸的朱茵被影到與老公黃貫中於中環睇婦科醫生。

Paul與朱茵十指緊扣進入一商業大廈,未有理會記者提問。

現年41歲的朱茵,自去年10月為黃貫中誕下女兒黃鶯(叉燒包)後,除專心湊女外,更積極收身復出賺奶粉錢。叉燒包眼仔睩睩肥嘟嘟,相當討人喜歡,早前朱茵更大爆向來性格火爆的Paul,每次見到囡囡都即刻收火。

不經不覺叉燒包已8個多月大,眼見女兒愈大愈得意,兩公婆亦有意為叉燒包追多個細佬。日前下午4時許,身穿牛仔褸配低胸短裙、厚底波鞋的朱茵,與Paul現身中環皇后大道中,早前減了17磅的朱茵,當日見其腹部微微凸起,翹住老公進入附近一幢診所林立的商業大廈,當中包括婦產科。兩人甫見記者即甚為愕然,問他們去哪裏?Paul未有理會,身旁的朱茵只拋下一句:「唔好意思。」然後與老公十指緊扣搭升降機上樓。逗留了個半小時,兩公婆手拖手離開商廈,步行到附近停車場取車走人。

其後記者問到朱茵是否再度有喜?Paul經理人說:「哈哈!咁奇怪?我啱啱返香港,未收到呢個消息喎!(影到佢哋出入醫生大廈。)係咪行街咋?可能去行街買衫,Paul成日叫朱茵得閒就陪佢買衫。可能大家覺得佢BB太得意,所以大家心急咗啦!」

曾批一成懷孕機會

此外,朱茵在書展推出新書《6磅10安士》吐心聲,更揚言是給囡囡黃鶯的情書。身為基督徒的朱茵,於書中表示曾被婦產科醫生指只有一成懷孕機會,加上要面對被外界狠批未婚懷孕,令她在懷孕初期又驚又喜。她將由發現懷孕到誕下囡囡的每一個珍貴時刻都記錄低,並與Paul充當囡囡的私人攝影師,在書中刊出多張從未曝光的溫馨照。