JM「翻版李準基」得閒開餐

黎明愛將文詠珊（Janice Man，JM）與藝人陳智燊（Jason）昨日出席《尋味之旅：酒瓶民藝瑰寶展》，JM坦言酒量欠佳，但懂得控制自己，不曾喝醉，她說：「依家好啲，兩年幾前飲幾啖就面紅。（飲太多會點？）會好Hyper同興奮大叫。啲人拍戲前唔飲酒，我反而會飲，幫助入戲。」

JM早前被《好報》獨家踢爆跟富二代衞以德出雙入對，有指二人拍拖並發展至同居階段。問到可有跟男友一起飲酒？她支吾以對地說：「同佢了解中，多數同老闆（黎明）飲。（Edwin追緊你？）了解中，有一齊食飯，我最近拍戲好忙，放假都有同朋友食飯。」再追問是否對Edwin有好感？她思考了數秒才說：「嗯……再了解多啲。（已經同居？）唔係呀！（覺得佢似李準基？）唔知似唔似，你哋話似。（佢投訴成日畀人影？）其實我已經唔係成日出街，就咁出去食飯，記者無處不在。（佢符合你擇偶條件？）自己好追求感覺同合唔合拍，要多少少時間。」

陳智燊酒後亂噏

至於同場的Jason則透露閒時亦有飲酒，問到曾否酒後亂性？他表示沒有：「會好多嘢講，坐唔定同好有自信，但冇亂性。」問他是否試過「做錯事」？他即一臉尷尬，停頓數秒才說：「同朋友有爭拗囉！興奮得滯講錯嘢，但應該冇你哋講嘅錯事。（有女仔向你借醉行兇？）可能對方熱情少少，細個嗰時都有試過同女仔落Club交換電話，可能言語上挑逗我，但行為上冇。」