Dominic不忿被指「抽水」宣傳，更揚言糖妹從沒提出分手。

本報昨日踢爆歌手黃山怡（糖妹）因不甘被「抽水」宣傳，狠撇奀星男友何浩文（Dominic），遭拋棄的Dominic昨日仍死撐未斷纜，但承認糖妹曾因他與日模松岡李那拍激吻戲而打爛醋埕，死心不息的他更決定約糖妺當面箍煲！

Dominic不忿被指「抽水」宣傳，更揚言糖妹從沒提出分手。

糖妹強調情已逝，不知會否接受Dominic邀約當面「講清楚」？

「被分手」的Dominic，曾與松岡李那拍激咀戲。（資料圖片）

貴為「宅男女神」的糖妹，昨日被本報踢爆不甘男友Dominic把她當宣傳工具，加上男友猶如女人湯圓，不時有女自動埋身，令她決心斬纜，但Dominic死心不息，堅稱與糖妹未分手，關係撲朔迷離。

昨日Dominic接受本報記者訪問，心情明顯大受打擊，全程「死狗聲」回應提問，他說：「最唔開心係話我『抽水』，其實唔係！我哋幾個禮拜前傾過偈，發覺工作觀點角度唔同，但佢唔會話我『抽水』，識咗四年，從朋友至今佢都唔會講。」他又死撐指雙方從沒講過分手，但承認很久沒見面，現決心要當面「講數」解決問題：「佢好忙，我又忙，大家時間夾唔到，WhatsApp都冇，要夾時間三口六面講清楚。」

日後拍咀戲會避忌

Dominic發誓絕無第三者介入，但踢爆糖妹曾打翻醋埕：「我發誓我冇第三者，但身邊多女性朋友無可避免，不過之前拍戲同松岡李那咀，知佢（糖妹）唔開心，下次會避忌吓。（糖妹因為呷醋分手？）可能，佢係女仔，現階段我未諗到點挽救。」而糖妹透過唱片公司表示二人已分手，不會再回應。

另外，糖妹戲劇師傅湯駿業昨日到電台受訪，提到糖妹與Dominic的「分訊」，他說：「之前有聽過，我諗兩個人分開總有佢哋嘅原因，兩個都成熟，應該經過深思熟慮，舊嘅唔去，新嘅點會嚟。」