芷珊6號真心獲「星」援

入行近30年的無綫節目主持黎芷珊，去年憑主持《最佳男主角》一炮而紅，更於無綫台慶頒獎禮中勇奪「最佳節目主持」，今年更升呢才女在書展出書，訴說人生中出現過的《我的男主角，我的女主角》。當年在《閃電傳真機》飾演「殭屍孫女」的芷珊姐姐是不少80後的童年回憶。芷珊當初全靠姑丈、賭王何鴻燊提攜而加入無綫，不過她自爆當年抗拒做主持：「我曾做歌手出唱片，不過十八歲時爸爸患病過身，姑丈擔心我嘅前途，所以介紹我入無綫做兒童節目主持，當時我唔慣扮嘢氹細路，之後扮殭屍孫女受歡迎，先開始有成就感！」

為霆鋒守秘

芷珊在鏡頭前是主持與嘉賓的關係，鏡頭後卻老友鬼鬼。憑着友情，連謝霆鋒都願在鏡頭前大爆秘密，她說：「霆鋒出道嘅第一個專訪係我同佢做，不過當時唔熟，十年前因為梁漢文，我哋做咗好朋友。舊年霆鋒接受《最佳男主角》訪問，事前想Send啲問題畀佢睇，點知佢話『我信得過你，唔使啦！』做訪問時，經理人霍汶希（Mani）打眼色，想霆鋒唔好講咁多，但佢當睇唔到。佢患皮膚癌已令大家好震驚，其實佢仲有一個更轟動嘅秘密冇出街，係我同佢之間永遠嘅秘密！」

芷珊成功令梁朝偉及劉青雲等巨星大爆秘聞，不過原來她初出道時曾慘遭黃秋生整蠱：「記得初出道時要訪問秋生，好大壓力，佢永遠只會答我『嗯』或者『係呀』，好彩後來佢知我份人冇乜嘢，之後啲訪問先順利啲。其實我一向都唔鍾意問啲尖銳嘅問題，但有時公司要求，我會靜靜雞Send定啲問題畀對方，等佢哋有心理準備。」

高峰遇低潮

擔任主持近三十年，芷珊深知不是「秀色可餐」的花旦，從不刻意追求名利，去年卻名利雙收，她坦言是人生起伏最大的一年：「舊年好好感情嘅哥哥因病過身，加上我同拍拖9年嘅男友（張達倫）分手，令我好低落！當時仲可以用工作麻醉自己。」問到為何《最佳女主角》已籌備逾半年仍未推出？她說：「除咗楊千嬅同劉嘉玲等答應受訪，我依家仲努力碌緊卡邀請嘉賓，希望節目可以如期推出！」

後記：敬業樂業

訪問當日，芷珊一早自備靚衫及首飾，拍照前更不停照鏡，相當貪靚！她更自備兩對靚鞋，她笑說：「為咗襯衫，帶多對鞋冇所謂，反正我鍾意買衫扮靚，其實我係購物狂，高峰時期試過用晒成份糧Shopping！」主持在鏡頭前最需要注重儀表，芷珊相當「敬業樂業」！

根據一項非正式統計，太完美的人會讓人覺得格格不入，反而「非完人」卻易於親近，由有線過檔無綫的主持陸浩明（6號）正是後者。他不俊俏、沒飛黃騰達．但憑內心一團火由低做起，從娛樂記者跑新聞、訪問名人，慢慢儲下不少人際脈絡，在娛圈打滾了十幾年後，終在無綫得到屬於他的個人訪談節目《6號訪》。做訪談式節目，難在要碌爆人情卡，偏偏給他面子的嘉賓多不勝數，如陳慧琳及蔡卓妍（阿Sa）等！為何6號會有「天大的面子」？他認真地說：「我係咪成日擦鞋呢？我覺得唔係，反而係緣分。點解我同阿Sa熟？其實佢係我Best Friend嘅中學同學，所以我細細個已經識佢，以前佢搞生日會，都會搵我做MC。」

黎明搵上門

跟阿Sa熟是緣分，那麼為何會跟黎明（Leon）熟？原來6號初識Leon，也是黎天王做主動。6號回想亦覺難以置信：「有次要由台北搭車去台南做電影訪問，當時有黃秋生同Leon。初頭覺得兩個都好難做，不過諗，秋生之前做訪問都冇鬧我，不如『上』啦！正當我搵緊秋生，Leon突然截住我話：『想同我飲杯嘢？』我當堂呆咗！我話：『係呀！』跟住佢話：『不如猜個枚先啦！』雖然我唔知點解Leon咁High，不過我順勢就話：『不如做咗個訪問先啦！』」

「金句王」黎天王在6號面前卻是「Hyper王」！回想被搭訕，6號依然津津樂道，他興奮地說：「當日我哋搭左3個鐘車，已經好攰，不過Roll機點都要扮精神，點知我講完第一句之後，Leon竟然話：『其實我哋都攰到死，6號你唔好扮High喎！』做完個訪問後，佢仲同我講：『我有睇你做南生圍鱷魚貝貝專題，都幾好笑！』嗰下真係好開心，冇諗過佢有留意我，而我哋份友誼就係咁樣建立。」

樂於做丑角

黎天王看中6號，但他亦有自知之明，自嘲並非做靚仔小生的材料：「有時上網都見到自己畀網民人身攻擊話：『個四眼仔咁醜樣，點解可以做到主持o架？』不過我睇完就算。講真，如果佢哋讚我靚仔我仲驚啦！不過唔靚仔仲好，可以盡快確立自己形象，唔驚做丑角。如果有少少靚仔，反而會有少少包袱……哎吔，唔好意思，我聽聽個電話先……」6號一接聽電話，眼睛即閃出一道光芒！從他堅定的眼神，便知道他「得米了」！他在電話中說：「電視廣告頒獎禮搵我做狼人？係咪電影《百星酒店》鄭中基嘅狼人？嗰個Look我好鍾意o架！」被邀做丑角也笑得像中六合彩，難怪6號深得黎天王喜愛！

後記：花輪同學

雖然6號自認不靚仔，不過他曾想過型得起。話說有次出席公開活動，他不止盛裝打扮，更以型頭現身，他說：「嗰日我覺得自己好型，Gel咗一個好似畢彼特嘅髮型，但有個人指住我個頭話：『好似花輪同學呀！』我心諗『有冇搞錯呀？我想行型仔路線囉！』」6號，認命啦！