天明願望BB有「便便」
藝人洪天明及湯盈盈前晚一齊舉行生日派對，兩位榮升父母的壽星仔女有B萬事足，「從前的浪子」天明生日願望是囝囝「便便」暢通，盈盈則表示囡囡的笑容是最好的禮物，又指「一滴酒」都冇飲，罕有地過了一個健康的生日。
獲家蔚獻吻的天明神情呆滯，唔通未飲已經醉？
樂樂當眾咀盈盈，非常煙韌！
方力申便裝到場與壽星仔女狂歡。
文頌嫻夫婦與姚樂怡夫婦齊行孖咇賀好姊妹盈盈生日。
姚樂怡夫婦
壽星仔女天明和盈盈前晚在黃長興的法國餐廳慶祝生日，一眾圈中好友包括歐陽震華（Bobby）、謝天華、阮兆祥、方力申、郭少芸、文頌嫻夫婦、姚樂怡夫婦、梁靖琪（Toby）、鍾麗淇、錢國偉及梁家樹夫婦等均有前來祝賀。昨日牛一的天明表示生日願望是囝囝身體健康：「但唔好快高長大，因為已經大得好快，同埋佢有啲便秘，希望佢去廁所順利啲！」
兩年後追多個
「慈父」的天明透露會追多個陪兒子：「等多兩年，BB兩歲幾先啦！（家蔚送咩畀你？）我叫佢唔好送，有都留番嚟送畀個仔。」天明更表示不醉無歸：「醉都係謝天華先。」身旁的家蔚即說：「已經預備咗間客房畀天明。」
而前日生日的盈盈則獲老公嘉樂陪睇喪屍片慶祝，嘉樂表示買了「女人鍾意嘅嘢」送給盈盈。問到有何生日願望？盈盈即一臉幸福說：「冇乜喎！已經好開心好滿足，朝早一起身見到個女對住我笑，呢個就係我最開心嘅Birthday Gift。」問到會否再有追B大計，嘉樂說：「唔係今日啦，遲啲先。」
此外，未知是否因眾人都已變為爸媽級，當晚的生日派對玩得不及以往瘋癲，盈盈說：「今年係我最健康嘅生日，冇飲酒。（掟蛋糕？）原先我心諗都會玩，但Toby買嗰個蛋糕又靚又貴，大家都唔捨得掟，係天明平時成日整蠱人，所以嘉樂都玩番佢，將啲忌廉點喺天明塊面度。」
