鄧達智大讚Fiona着衫靚，並笑言願為對方設計婚紗。

薛凱琪身邊男伴多籮籮，但她揚言冇拖拍Dry爆，母親更要為她擺桃花陣，昨日首次行婚紗騷的她表示穿上婚紗感覺似結婚，希望盡快搵到如意郎君，而設計師鄧達智更讚她着出美感，值100分。

鄧達智大讚Fiona着衫靚，並笑言願為對方設計婚紗。

穿上婚紗的Fiona坦言感覺似結婚。

薛凱琪（Fiona）昨日擔任澳門銀河綜合度假城婚紗騷模特兒，她穿上由鄧達智設計的白色婚紗，佩戴價值65萬元的頭飾，恍如女神。Fiona透露第一次着婚紗行騷：「好有就嚟結婚感覺。（行嗰陣諗住邊個？）就算冇另一半，行騷嗰陣都好開心，好奇妙。」她表示酬勞好，更大讚鄧達智的設計適合她，她笑說：「女仔最靚就係着婚紗，但我唔會讚自己靚。我除低婚紗就回現實，感覺似拍戲。」

盼草原行禮

Fiona希望將來能在外國的草原舉行婚禮：「我鍾意室外搞（有對象？）會搵好對象，但暫時未知。（想快啲嫁？）冇，依家等個天畀我，我已Ready拍拖。」問到可有追求者？她坦言日日對住助手，連發夢都見到助手，大呻好Dry，並說：「媽咪信風水，話搬咗屋三年我都冇拖拍，佢話要擺桃花，但我有宗教信仰，覺得要有就會有。」

此外，鄧達智大讚Fiona值100分：「之前我哋唔識，但我一直都有留意佢，覺得佢着衫幾靚。」他亦表示今次設計婚紗給Fiona要突出她的頸及腳：「其他模特兒高，所以設計時就用佢最靚嘅頸同腳嚟突出。」他又謂希望Fiona快點嫁人，若結婚亦會幫她設計婚紗。