婷婷含淚悔分手
自被揭與演員安志杰分手後，謝婷婷閉關差不多一個月未有開腔回應，至前晚終「蒲頭」出席活動，明顯受情傷消瘦不少，提到舊情時更不時眼泛淚光，一再強調分手非涉及第三者，問到是否仍愛對方，她肯定地說︰「Yes！Of Course！」言語間對當初提出分手感到後悔！
婷婷甩拖後首次出席公開活動，重提舊情時一臉愁容。
安志杰早前被拍得逛傢俬店，添置家具後返回「寡佬竇」。
設計圖片及對白
拍拖期間如糖黐豆般被視為圈中恩愛情侶的謝婷婷與安志杰（Andy），上月底被《好報》踢爆已分手兩個月，隨後Andy亦公開承認與婷婷四年情玩完。一直潛水療情傷的婷婷，前晚終於現身出席《全新BMW 3系Gran Turismo盛大派對》，並首度開腔回應。輕露事業線的婷婷明顯比前消瘦，受訪時更眼泛淚光，聲音低沉，她多次強調分手不涉及第三者，言語間為當初主動提出分手明顯感後悔。
婷︰謝婷婷 記︰記者
記︰現時心情如何？
婷︰（眼角有淚光）依家適應緊！
記︰大家仲有冇聯絡？
婷︰好少！
記︰有冇為分手喊過？
婷︰有喊過。（依家仲有？）有時會。
記︰分手原因係咩？
婷︰（停一停後再說）大家都睇得出我哋四年嚟都好認真，好尊重對方，我哋係喺辛苦同艱難情況下先做到呢個大決定，係和平分手，有共識，唔係外間所傳佢唔拍《一代宗師》、唔上進，或者有第三者，絕對唔係！次次你哋問我，我都話佢工作緊㗎！
記︰Andy之前受訪，話係自己嘅錯？
婷︰（沒有直接回應，只形容現時狀況）最近靜落嚟，心情冇咁混亂，身邊好多朋友都關心我，佢哋知我呢個係大轉變，令我更加唔想大家去猜測係咪有第三者，絕對冇第三者！
三度強調冇第三者
記︰係咪佢未Ready結婚？
婷︰唔係，人生要配合Timing。
記︰仲深愛對方？
婷︰（肯定的語氣）Yes！Of Course！（當然！）大家睇住我長大，知我呢段關係最長。
記︰點解咁愛對方仲分手？
婷︰（再次停頓）兩個人一齊耐咗，好多原因可以導致分手，但唔係大家諗嘅原因，唔關第三者事。
記︰會唔會復合？
婷︰（又再停頓）真係唔知。
記︰有冇（同Andy）傾過復合？
婷︰（苦笑）自己同自己傾過囉！
記︰係咪想再一齊？
婷︰一段咁長嘅關係唔係話放低就放低，唔會好似機械人咁㩒個掣就冇事。
記︰Andy取消對你Instagram嘅關注？
婷︰我初初都冇Delete，因為想睇吓隻狗仔近況，但依家都Delete咗，因睇到佢嘅消息會覺得心痛。
記︰覺唔覺Andy絕情？
婷︰唔係，大家都花好多時間去接受呢個決定，係艱難嘅事。
記︰屋企仲收埋Andy啲嘢？
婷︰大家住埋咁耐，DVD都係一齊買。
記︰會唔會搬走？
婷︰唔會。
否認陪新歡赴菲國
記︰父母有冇因為你冇結婚反而分手感到難過？
婷︰佢哋唔係話重唔重視結婚呢個話題，而係當時見到兩個細路哥（指自己與謝霆鋒）唔開心，佢哋都唔開心。
記︰叫哥哥（霆鋒）介紹男仔畀你？
婷︰（笑）我介紹女仔畀佢多過佢介紹我，佢知我需要時間適應。
記︰你哋分手，有冇影響哥哥同Andy嘅感情？
婷︰冇，哥哥好大方。
記︰傳你之前同新歡去菲律賓旅行？
婷︰呢件事我真係要澄清，當時啱啱分手，係我自己一個去做瑜伽，唔信可以Check番。
記︰話你有新男友？
婷︰Andy都喺微博澄清話唔係呢個意思，唔好誤會。
記︰依家單身？
婷︰係。（咁準備迎接新戀情未？）未！
