歌手蕊蕊與女子組合Super Gear成員Kelly早前結伴到韓國學藝，二人每日跳足8粒鐘，訓練後更需互貼藥膏鬆筋，更大呻冇時間血拼。

旅程尾聲時，Kelly（左）及蕊蕊終可一嘗當地美食。

Kelly（左）與蕊蕊（右）日跳8粒鐘，連購物都冇時間。

蕊蕊（左二）與Kelly（中）獲安排到韓國學藝。

藝人最緊要是裝備自己，歌手蕊蕊與組合Super Gear成員何麗娟（Kelly）早前獲公司資助，赴韓國學唱歌及跳舞兩星期，自我增值。二人雖然身處港女最愛掃化妝品的韓國，但卻大呻辛苦，因訓練由朝跳到晚，根本無暇購物，蕊蕊說：「公司安排密集式訓練，每日要跟跳舞老師學足八粒鐘，有時連飯都攰到唔想食，仲邊有時間買嘢？」有舞蹈底子的蕊蕊坦言此行收穫甚豐，希望學有所成，將「成果」傳授給師妹，她說：「今次學到好多新嘅舞蹈技巧，希望可以教Super Gear同MVG，對大家事業都有幫助。」

化身按摩女郎鬆筋

Kelly大爆蕊蕊在韓期間，每到晚上即變身「阿婆」要人「照顧」，Kelly說：「每晚返到酒店，啲筋都已經跳到硬晒，有時我哋要互相黐藥膏，有次我要幫蕊蕊拉筋，佢先落到床，勁誇張！」幸旅程最後兩日終有餘閒，但只可在當地品嘗美食，感受「泡菜文化」，蕊蕊說：「臨尾兩日終於有少少時間可以輕鬆，我即刻搵咗啲韓國朋友出嚟帶我哋食好嘢，順便買手信添！」