陳法拉甩拖了

陳法拉昨日出席活動，明顯比前肥了，穿白色Deep V露背裙的她表現風騷，似未受情變影響。早前到美國進修的她表示剛返港，今日會到馬來西亞宣傳《衝上雲霄II》，至於與無綫續約問題，她說：「唔傾住，呢段時間有好大變化，老師畀好多啟發我，令我調節做演員心得，改埋性格，以前較直接同主觀，依家學識企中間睇唔同角度，真係Amusing（有趣），仲改變我嘅價值觀，係終生改變。（包括感情變化？）知道有雜誌報道我感情事，當時喺美國，有打畀薛生，大家向來對感情事低調，今日有諗過唔回應，薛生都話唔好回應。（你唔否認單身？）我哋達成共識，唔再講，知大家擔心我，我同大家講，我好開心，呢幾個月思維好清晰，知道日後嘅路點行。（新開始？）算係。」

記者兩度問法拉現時與薛世恒的關係，她說：「好幸福嘅狀態，良好關係。（朋友定男女朋友？）兩個人相處好難解釋乜嘢關係，特別係咁長嘅感情，兩個人真心相處，唔忍心用我把口畀定義佢。（你提出分手？）我冇講過。（唔想Hurt佢？）唔答。（傳佢唔畀錢你開公司而分手？）周刊寫唔係事實，黎耀祥講過開公司商業登記幾十蚊就得。」她指近日微博文字純粹抒發情緒，又否認情變才去讀書，並說：「唔好為賣書作古仔強姦我哋嘅價值觀，唔好將我工作同金錢掛鈎，總之日後我經濟點都100%做番呢行。」對於諸葛紫岐有孕，她亦送上恭喜。

續住舊愛巢坐薛車

據知法拉與薛世恒關係保持良好，故她從美返港後仍居於昔日的半山豪宅及以薛家名下七人車代步。於活動後，她由中環到尖沙咀High Tea，期間遇上任達華，到餐廳內寒暄後再各自離去，法拉之後到跑馬地馬場吃飯。