樂易玲生日杏兒阿佘撐場

下月一日是無綫製作資源部總監樂易玲的54歲生日，前晚她在中環預先舉行慶祝派對，近百好友、藝人包括陳百祥、苗僑偉夫婦、黃柏高、何麗全、陳國強、馬德鐘、謝天華、吳卓羲、丁子高和陳嘉桓等到賀，惟樂易玲錫到燶的三大「契仔」、林峯、黃宗澤及鄭嘉穎，卻齊齊「No Show」未見人影，幸而兩大視后佘詩曼和胡杏兒百忙抽空畀面撐場，增添星光。

去年，就算遲到亦有趕來的林峯，昨日透過經理人回應正在內地拍攝《大漢賢后衞子夫》劇集，因工作行先所以未能出席，問到會否擔心樂易玲嬲時，經理人代答：「生日年年有，就算拍劇嚟唔到，遲啲都會補祝番。」而已連續兩年冇到的黃宗澤，記者昨日致電他時，他解釋因趕拍劇集《貓屎媽媽》而未能出席，他說：「知道樂小姐生日，但尋日開工開到凌晨兩點，好忙去唔到，已經發咗訊息畀樂小姐祝佢生日快樂，佢都好好，叫我如果早收就去坐吓。（擔心佢嬲？）點會嬲，我遲啲都會請番佢食飯。（會唔會送禮呀？）雖然佢年年都叫唔好送，但如果睇啱有咩啱佢，都會買畀佢。（因為避舊愛胡杏兒唔到？）我都唔知有邊個到。」

心情靚飲酒面紅

同樣兩年生日會都未見人影的鄭嘉穎，現正在台灣拍攝新歌MV，在截稿前仍未獲回覆。而在前晚的生日派對上，雖然三大「愛將」冇影，但未有影響主角樂易玲心情，她在派對舉行不久已飲得面紅紅，在訪問時透露因將放假十日，要陪小朋友參加Summer School，所以提早慶生：「其實除咗慶祝生日之外，亦都係慰勞一班同事。（唔畀送禮物？）年年都係，一定唔收禮，如果想買禮物，不如捐錢做善事。（傳不和嘅馬德鐘都有到？）從來冇咁嘅事，佢係我生日會嘅鐵腳嚟！」另又大讚百忙抽空到來的胡杏兒很有心，昨日她又把生日派對的合照上載微博。

內地拍劇常中暑

另外，被樂易玲大讚的胡杏兒，最近正在內地拍攝無綫劇《巾幗梟雄之諜血長天》，出席完生日會後即時趕返內地繼續拍攝，被問到是否特意回港出席時，她說：「咁又唔係，係咁啱放假返香港。內地依家好熱，成37度，自己都拍到中暑成日想嘔，食咗中藥同睡覺之後好番啲。（有冇送禮？）樂小姐講明唔准送禮ｏ架！」

至於與無綫已沒有經理人合約的佘詩曼，前晚帶同禮物到賀，問到送甚麼時，她笑說：「靚女用嘅嘢！（會唔會不醉無歸呀？）唔會喇！今晚好開心，好耐冇見班同事。（會唔會搵樂易玲傾合作？）唔會，生日會嘛！下年可能返無綫拍嘢，但唔講得住，傾好咗先。依家放假，內地依家好熱，等九月涼啲，先再上去拍嘢。」