著名製作人謝利獲邀打星星，當之無愧。（美聯社圖片）

名製作人謝利畢咸馬（Jerry Bruckheimer）前日在荷里活星光大道打星星，獲型佬影星湯告魯斯（Tom Cruise）及尊尼特普（Johnny Depp）撐場，但尊尼又殘又走樣，相信要向同齡的「防腐湯」請教保養心得！

著名製作人謝利獲邀打星星，當之無愧。（美聯社圖片）

謝利打造的「魔盜王」系列電影，將尊尼特普的事業推向高峰。（美聯社圖片）

獲得星光大道第2,501粒星星殊榮的謝利，曾炮製不少名作，包括尊尼主演的《魔盜王：決戰鬼盜船》（Pirates of the Caribbean And the Curse of Black Pearl）及其系列電影，以及捧紅靚佬湯的《壯志凌雲》（Top Gun）及《雷霆壯志》（Days of Thunder），難怪兩大巨星都到場力撐！謝利在台上笑言多年來未得星星是被大會漠視，又透露其實大會曾向他招手，但他打算等適當時候才接受，更趁機硬銷新片《獨行俠》（The Long Ranger）現在出爐就是適當時候，間接谷宣傳！

湯佬搭神秘女伴

而與謝利合作《獨》片的尊尼讚揚戰友：「冇謝利就冇魔盜王，冇積克船長，更加唔會有《獨》片，好多謝佢，佢對我同對大家嚟講都係傳奇！」不過肉緊地演講期間，他被拍得反白眼露出騎呢神情，加上老土西裝、髮型凌亂兼有鬚根及皺紋，簡直完全走晒樣！相反，同為50歲的靚佬湯雖打扮輕便，但「防腐」外形完全擊敗尊尼，難怪搭着神秘女伴到場的他一臉風騷！

傳跌出福布斯百大

此外，日前有傳尊尼跌出《福布斯》（Forbes）今日公布的年度名人百大排行榜，其餘上榜常客畢彼特（Brad Pitt）、歌手Adele及Britney Spears亦未有入圍，走樣兼跌名氣的尊尼似乎要再發力突圍了！